ଟୋପାଏ ସିନ୍ଦୁର- ଯୋଡେ ହୃଦୟ

ଜନ୍ମ ସ୍ଥାନ ଆତ୍ମୀୟ ସହୋଦର 

ଟୋପାଏ ସିନ୍ଦୁର କରିଦିଏ ପର

ଟୋପାଏ ସିନ୍ଦୁର ବଳରେ ସାତପର

ହୋଇଯାଏ ଏକାନ୍ତ ଆତ୍ମୀୟ ନିଜର

ପୁରୁଣା ସମ୍ପର୍କ କାଟେ ଯୋଡେ ନୂଆ

ମଥାରେ ଅବା ଅଗ୍ନି ପରୀକ୍ଷାର ନିଆଁ

ସୀମନ୍ତିନୀ ମସ୍ତକରେ ଜଳେ ଦାଉଦାଉ

ଲକ୍ଷ୍ମଣଙ୍କ ତିନିଗାର ବଳି ତା'ର ଭାଉ

ସତୀ ନାରୀର କରେ ଯେତେ ଉପକାର

ରକ୍ଷା କବଚ ସାଜେ ଆପଦେ ପ୍ରିୟର

ଟୋପେ ସିନ୍ଦୁର ନାରୀକୁ ଦିଏ ଯେ ସମ୍ମାନ 

ଦେଇ ପାରେ ନାହିଁ ମହଣ ମହଣ ସ୍ୱର୍ଣ

ପତ୍ନୀର ଅମୋଘ ଅସ୍ତ୍ର ମହା ପରିଚୟ

ସଭ୍ୟ ସମାଜରେ ଆନ ନୁହେଁ ତୁଳନୀୟ

ସୀମନ୍ତିନୀ ନାରୀର ଗୌରବ ସୁନ୍ଦର 

ଧନ୍ୟ ଧନ୍ୟ ଗୁଣ ତବ ଟୋପାଏ ସିନ୍ଦୁର