ଟିକେ ଶୁଣିବ କି ?

ହଇ ହୋ ଶୁଣୁଛ   ଉଠୁନ କାହିଁକି

ବଜାରକୁ ଯିବ ପରା

ରାତି ପାହିଲେ ମୋ ସାବିତ୍ରୀ ବରତ

ମାଗୁନି ତୁମକୁ ହୀରା ।

ବଜାର ଯିବାକୁ କୁହନା ଲୋ ଗୋରୀ

ବାହାରେ କରୋନା ଭୟ

ତୋ ପୂଜା ପାଇଁକି  ଅକାଳରେ ମୁହିଁ

ଯିବି ନାହିଁ ଯମାଳୟ ।

ସେତିକି ରଖିଥା    ତୁମ ଥଟା କଥା

ଆଣିବ ଦି'ପଟ ଶଂଖା

ଶ୍ରୀଫଳ କଦଳୀ    ଆମ୍ବ ପଣସ ଯେ

ତୁମେ ନଖାଇଲେ ଖା ।

କେମିତି ତୁହି ଲୋ   ଆଧୁନିକ ନାରୀ

କାହା ପାଇଁ କରୁ ବ୍ରତ

କରୋନାଟା ଯଦି  ନେଇ ଯିବ ମୋତେ

ମୋ ବୋପାର ପୁତ୍ର ।

ନିଆଁ ଗିଳା କଥା     ମୁହଁରେ ଧରନି

ପିନ୍ଧିବ ତୁଣ୍ଡରେ ତୁଣ୍ଡି

ସାନଟାଇଜର     ହାତରେ ବୋଳିବ

ଭାବନା ମୋତେ ହେ ହୁଣ୍ଡି ।

କାହିଁକି ଯାଉନି      ବଜାରକୁ ମୁହିଁ

କହୁଛି ତୋତେ ବୁଝାଇ

ମୁଣ୍ଡେ ହେଲମେଟ ତୁଣ୍ଡେ ମୁଣ୍ଡି ଦେଲେ

ସାବିତ୍ରୀ ଦିଶିବେ ନାହିଁ ।

ରସିକିଆ ଛାଡି      ପାଟ ପିନ୍ଧାଇବ

ଦଶ ହଜାରରେ ଆଣି

ବାପା ବୋଉ ଖୁଣ୍ଟା ଦେବ ନାହିଁ ମୋତେ

ସରଗକୁ ଦେଖିଲେଣି ।

ଝିଅ ଦେଇ ମୋତେ  ମୁକୁଳି ଗଲେ ସେ

ପିନ୍ଧାଇ ଅହିର ହାର

ଚା' ବିସ୍କୁଟ ତୁ     ପୂଜା କରିଦେ ଲୋ

କରୁଛି ଦୂରୁ ଜୁହାର ।

ମଦ ମାଉଁସକୁ       ଗିଳିଲା ବେଳକୁ

ବାଟ ହୁଅ ନାହିଁ ବଣା

ସାବିତ୍ରୀ ପାଇଁକି       ନାଟକ କରୁଛ

ଚୋବାଅ ଲୁହାର ଚଣା ।

ଲୋଡା ନାହିଁ ମୋର   ସାବିତ୍ରୀ ବ୍ରତ ହେ

ସୁସ୍ଥ ଥାଅ ଚିର କାଳ

ତୁମେ ମୋ ସିନ୍ଦୂର    ତୁମେ ମୋ ଈଶ୍ଵର

ତୁମେ ମୋ ସୌଭାଗ୍ୟ ଫଳ ।