ଠାକୁରାଣୀ
ଠାକୁରାଣୀ
ଠାକୁରାଣୀ, ଜଗତ ଜନନୀ ମା' ଭବାନୀ
ଠାକୁରାଣୀ, ଜଗତ ଜନନୀ ମା'ଭବାନୀ ।
ତୋ ଯୁଗଳ ପଦ ପଙ୍କଜ ପୟରେ
ଲୟ ରଖି ମାତ ଆରାଧନା କରେ
ବିଶ୍ଵର କଦନ, ୟେ ଦୁଃଖ ଦୁର୍ଦ୍ଦିନ
ଦୂର କର ହେରମ୍ଵ ଜନନୀ, ଠାକୁରାଣୀ ।
ଉର୍ବୀ ମେଘାଚ୍ଛନ୍ନ କରେ ହୀନିମାନ
ନିଃସହାୟ ଲାଗେ ଏ ଜୀବନ ମନ
ଆସ ଆସ ଦେବୀ, ପରମ ବୈଷ୍ଣବୀ
ଉଦ୍ଧାର କର ମା' କାତ୍ୟାୟନୀ, ଠାକୁରାଣୀ ।
ଅସମୟେ ଆଜି ୟେ ପାର୍ବଣ ଋତୁ
ମାନବ ସମାଜେ କାଳ ରାହୁ କେତୁ
ଲିଭାଇଛି ସୁଖ, କରିଛି ବିମୁଖ
ଆଖିରୁ ନିରତ ଝରେ ପାଣି, ଠାକୁରାଣୀ ।
ପାର୍ବଣର ସୁଖ, ଶାନ୍ତି, ମୈତ୍ରୀ ଭାବ
ଦୁର୍ଲ୍ଲଭ ଲାଗଇ ଅବା ଅସମ୍ଭବ
ଦିଶୁଛି ଅନ୍ଧାର, ଜୀବନ ଅସ୍ଥିର
ଉଦ୍ଧାର କର ଅଦ୍ରି ଦୁଲଣୀ, ଠାକୁରାଣୀ ।
ତଥାପି ତୋହର ନୀରାଜନା ପାଇଁ
ନିସ୍ଵ ଜନତା ରହିଛି ଅନାଇଁ
ତୋର ଅଭ୍ୟର୍ଥନା, ତୋହର ବନ୍ଦନା
ଗାଏ ଆସ ଦେବୀ ସୁଲକ୍ଷଣୀ, ଠାକୁରାଣୀ ।