ତୋ ଆଖିରେ ମୋ ଆଖି

ଅଣସର ଘରେ ଫୁଲୁରି ତେଲରେ

ମହମହ ବାସେ କାଳିଆ,

ଜରରୁ ଉଠି ସେ ରଥରେ ବସିବ

ହଲାଇ ଆସିବ ଟାହିଆ।

କଳାକାହ୍ନୁ ବଡ଼ ହଟିଆ

ବଡ଼ଦାଣ୍ଡେ ତାକୁ ଚାହିଁ ରହିଥିବେ

ଦେଖି ହେବେ ଭକ୍ତ ବାଇଆ।

ବଡ଼ଦାଣ୍ଡ ଧୂଳି ଦେହେ ହୋଇ ବୋଳି

ସାତ ଜନ୍ମ ପାପ ଧୋଇଣ,

ଜୟ ଜଗନ୍ନାଥ ଉଚ୍ଚ ସ୍ଵରେ ଡାକି

ମୁଣ୍ଡିଆ ମାରିବା ଅରୁଣ,

ଆହାଃ ଭକ୍ତ ଭଗବାନ ମିଳନ

ସିଂହଦ୍ଵାରେ ଚକାନୟନ ସାଥିରେ

ମିଶାଇ ଦେବି ମୋ ନୟନ।

ଜୟ ବିଜୟ ସାଥିରେ ହନୁମାନ

ଛୁଇଁ କରିବି ଜଣାଣ,

ଗୋଟି ଗୋଟି ଗଣି ବାଇଶି ପାହାଚ

ଚଢିବି କରି ନମିଣ,

ଗୁହାରି କରିବି ପୁଣ

ତୁମ ଚକାଆଖି ମୋ ଆଖିରେ ନାଚୁ

ନାଚୁ ଛାଡିଯାଉ ପ୍ରାଣ।