ତିନି ମାଙ୍କଡ

ପାଟିରେ ହାତ ଦେଇ ଦିନେ କରିଥିଲି ପଣ

କହିବିନି କେବେ ଖରାପ କଥା କାହାକୁ

କାହିଁକି କେଜାଣି ବେଳେବେଳେ ପଣ ଭାଙ୍ଗିଯାଏ

ମୁଁ ହାରିଯାଏ ସେ ପାଟିରେ ହାତ ଦେଇଥିବା ମାଙ୍କଡ ଆଗେ ।

ଅନେକ ଥର ଚାହିଁଛି ଶୁଣିବିନି ଖରାପ କଥା

କାନେ ହାତରଖିଥିବା ମାଙ୍କଡଟି ହସେ ମୋତେ ଦେଖି

ଖରାପ କଥା କାନ ବନ୍ଦ ସତ୍ତ୍ବେ ବି

ମୁଁ ଶୁଣିପାରେ ବେଶ ଆରାମରେ

ମନ ଜମା କାହିଁ ବୁଝେନି ।

ଆଖିଟା କେଉଁଥିରେ ଗଢା କେଜାଣି

ସବୁବେଳେ ଚଳ ଚଞ୍ଚଳ ପାରେନି କାବୁ କରି

ଭଲ ଠାରୁ ଖରାପକୁ ସେ କରିନିଏ ବେଶି ନିଜର

ବେଶି ବେଶି ଲୋଭ ବଢୁଥାଏ ଦେଖିବାକୁ ବାରମ୍ଵାର ।

ଭଲ ଠାରୁ ଖରାପଟା ଏତେ ବିଶ୍ଵସ୍ତ କାହିଁକି

ଯାହାକୁ ଲୁଚାଯାଇଥାଏ ଫରୁଆରେ

ମନ ଖୋଜେ କାହିଁ ବାରମ୍ଵାର ତାକୁ

ଆଖି କାନ ପାଟିକୁ ଦେଇହୁଏନି ତୁଣ୍ଡି

ଭାରି ଅବୋଲକରା ଏମାନେ

ଏମାନଙ୍କର ପୃଥିବୀ କୁଆଡେ ଅଲଗା 

ସେମାନେ କୁହନ୍ତି ମୋତେ କାନେ

ଅନ୍ଧାର ନ ଥିଲେ ଆଲୋକର କି ଥାଏ ମଜା

ସବୁକିଛି ଅନୁଭବ ଲୋଡା ଏ ଜୀବନେ  

ସେଥିପାଇଁ କୁହାଯାଏ ପରା ସଦା 

ହାତେ ମାପି ଚାଖଣ୍ଡେ ଚାଲ ।