ସୂର୍ଯ୍ୟ

ସୂର୍ଯ୍ୟ 

ସକଳ ଶକ୍ତିର ଆଧାର 

ଦିନନାଥ ଦିବାକର ସବିତା ଭାସ୍କର 

କେତେ ଯେ ନାମ ତାଙ୍କର 

ଦିନମଣି ସହସ୍ରାଂଶୁ ବିକର୍ତ୍ତନ ମିହିର 

ଚିର ବନ୍ଦିତ ଚିର ନମସ୍ୟ ସେ କୋଟି ହୃଦୟର ll

ସୂର୍ଯ୍ୟ 

ସେ ନିର୍ଲିପ୍ତ ନିର୍ବିକାର 

ତ୍ରିଗୁଣରହିତ ଆଦିତ୍ୟ ଭାନୁ ପ୍ରଭାକର 

ଉତ୍ତପ୍ତ ପ୍ରଜ୍ୱଳିତ ପିଣ୍ଡରୁ ମାର୍ତ୍ତଣ୍ଡ 

ଜୀବନ ଆଧାର ସେତ ଏ ଜୀବ ଜଗତର ll

ସୂର୍ଯ୍ୟ 

ଆଲୋକ ପ୍ରଚେତା ସେ ତ ରବି ଦିନକର 

ବିବସ୍ୱାନ ତପନ 

ପ୍ରକୃତିର ଏଇ ନୈସ୍ୱର୍ଗ କାନନେ 

ଅବିଶ୍ରାନ୍ତ ଅବାରିତ ସଦା ଉଜାଗର 

ବ୍ରହ୍ମମୟ ପ୍ରେମମୟ ଏ ସୁନ୍ଦର ସୃଷ୍ଟିର ll

ସୂର୍ଯ୍ୟ 

ସେ ସୃଷ୍ଟିର ସମ୍ଭାର 

ଅଂଶୁମାଳୀ ଆଦିଦେବ ବିଶ୍ୱ ବ୍ରହ୍ମାଣ୍ଡର 

ଚିର ସ୍ମରଣୀୟ ଚିର ବରଣୀୟ 

ଅଭିନନ୍ଦନୀୟ ସେ ପରମ ଆସ୍ଥାର ll

ସୂର୍ଯ୍ୟ 

ଅସ୍ତମିତ ରଶ୍ମି ମତେ ଭବ୍ୟ ଗୋଧୂଳିର 

ଅନବଦ୍ୟ ସୃଷ୍ଟି ସେ ତ ବିଚିତ୍ର ସୃଷ୍ଟିର 

ଚରମ ଆଦର୍ଶ ସେ ତ ଜୀବ ମାନସର 

ପରମ ବିସ୍ମୟ ଏଇ ଅନିନ୍ଦ୍ୟ ବିଶ୍ୱର ll

ସୂର୍ଯ୍ୟ 

ପରମ ପୂଜ୍ୟ ସେ ତ ଆସ୍ଥା ବିଶ୍ୱାସର 

ସତ୍-ଚିତ୍-ଆନନ୍ଦ ସେ ଜୀବନ ଯାତ୍ରାର

ସୃଷ୍ଟିର ରକ୍ଷଣେ ସେ ତ ଜାଗ୍ରତ ଭାସ୍ୱର 

ପ୍ରାତଃ ପୟୋଧିରେ ତାଙ୍କୁ କୋଟି ନମସ୍କାର ll