ସୁପରହିରୋ ଶ୍ରୀକୃଷ୍ଣ
ସୁପରହିରୋ ଶ୍ରୀକୃଷ୍ଣ
କି ସୁପରହିରୋ ସେ
ଜନମି ଥିଲା ଏ ଭାରତବର୍ଷେ
ବାଳ କାଳୁ ହେଲା କି ବଳଶାଳୀ
ଏନ୍ତୁଡ଼ିଶାଳରୁ ପୁତନା ମାରି
ଷଣ୍ଢା ଅଘା ବକା ଶକଟା ଚକଟା
ଗିରି ତୋଳିଥିଲା ସାତ ବରଷେ
କି ସୁପର ହିରୋ ସେ |
କୋଟି କାମ କଳା ରୂପ ଯାହାର
ଷୋଳସସ୍ର ଗୋପୀ କରେ ବିହାର
ରାଇ ପ୍ରେମେ ବାଇ ମୂରଲୀ ବଜାଇ
କୁଞ୍ଜ ବନେ ରାସ ରସେ ବିଳସେ
କି ସୁପର ହିରୋ ସେ |
କାଳୀ ନାଗ ଶିରେ କଲା ନର୍ତ୍ତନ
ଇନ୍ଦ୍ର ଧାତା ଗର୍ବ କଲା ଗଞ୍ଜନ
ଦାବାଗ୍ନି ଅନଳ କରିଲା କବଳ
କୁବଳୟା ଦାନ୍ତ ଉପାଡ଼ିଲା ସେ
କି ସୁପର ହିରୋ ସେ |
ଅଷ୍ଟମଲ୍ଲ ବଧି କଂସ ସଂହାରି
କାରାଗାରୁ ପିତା ମାତା ଉଦ୍ଧାରି
ସାଗରେ ଦ୍ଵାରକା ନିର୍ମାଣିଲେ ଏକା
ପାରିଜାତ ଆଣେ ପ୍ରିୟା ସକାଶେ
କି ସୁପର ହିରୋ ସେ |
ଭାରତ ଯୁଦ୍ଧରେ କରିଲା ପଣ
କରିବନି ସିଏ ଅସ୍ତ୍ର ଧାରଣ
ଅଙ୍ଗୁଳି ନିର୍ଦ୍ଦେଶେ ସବୁ ନାଶି ଶେଷେ
ପାଣ୍ଡବେ ରଖିଲା କରୁଣା ବଶେ |
ଅଠର ଅଧ୍ୟାୟ ଗୀତା କହିଲା
ଜ୍ଞାନଗଙ୍ଗା ଆଣି ମର୍ତ୍ତ୍ୟେ ବାହିଲା
ଯମପୁରୁ ଗୁରୁପୁତ୍ରଙ୍କୁ ଆଣେ ସେ
ପୂର୍ଣ୍ଣ ବ୍ରହ୍ମ ନର ରୂପ ପ୍ରକାଶେ
କି ସୁପର ହିରୋ ସେ |
ତାଠାରୁ ହିରୋ କେ ଅଛି ଜଗତେ
ଶରଣ ତାହାର ଶ୍ରୀପଦଗତେ
ହେ ମହିମା ମେରୁ କାମକଳ୍ପତରୁ
ଏତିକି ସୁଦୟା କରିବ ଦାସେ
କି ସୁପର ହିରୋ ସେ |