ସୁନାପିଲା

ମଥାକୁ ସୁନ୍ଦର କେଶ,                           

ଓଠକୁ ସୁନ୍ଦର ହସ,        

ସକାଳୁ ସକାଳୁ ଶେଯ ଛାଡି ଆଗେ,              

ଭଲଭାବେ ଦାନ୍ତଘଷ  |             

ନଈକୁ ସୁନ୍ଦର ଜଳ,                          

ଗଛକୁ ସୁନ୍ଦର ଫଳ,              

ବାଛିବାଛି ଖାଅ ସବୁଜ ପରିବା,             

ଦେହରେ ବଢିବ ବଳ  |                

ପାଦକୁ ସୁନ୍ଦର ଜୋତା,                       

ଖରା ବରଷାକୁ ଛତା,               

ମନ୍ଦକଥା କହି ମନରେ କାହାର,            

ଦିଅ ନାହିଁ କେବେ ବ୍ୟଥା  |               

ହାତୀକୁ ସୁନ୍ଦର ଛତି,                      

ମାଛକୁ ସୁନ୍ଦର କାତି,               

ପଢା ବେଳେ ପଢ଼,                         

ଖେଳ ବେଳେ ଖେଳ,               

ମିଳିମିଶି ସାଙ୍ଗସାଥୀ  |                

ଅଜାଙ୍କୁ ସୁନ୍ଦର ବାଡ଼ି,                      

ରାସ୍ତାକୁ ସୁନ୍ଦର ଗାଡି,               

ସତକୁହ ସଦା ମିଛ କୁହନାହିଁ,               

କେବେ କା କଥାରେ ପଡି  |             

ଦେଶକୁ ସୁନ୍ଦର ରାଜା,                     

ବାହାକୁ ସୁନ୍ଦର ବାଜା,               

ଗୁରୁ, ଗୁରୁଜନ ଦେବତା ସମାନ,            

କର ତାଙ୍କୁ ଭକ୍ତି ପୂଜା |                 

ଦିଅଁଙ୍କୁ ସୁନ୍ଦର ରଥ,                        

ରଥକୁ ସୁନ୍ଦର ନେତ,                

ସୁନାପିଲାଟିଏ ହେବ ଯଦି ତୁମେ,             

ମୁଁ ହେବି ତୁମର ମିତ  ||