ସୁନାମ ପାରିବା ଧରି
ସୁନାମ ପାରିବା ଧରି
ଗଛ ଯେତେ ଅଛି ଯେଉଁଠି ବି ଥାଉ
ସବୁ ତ ହେବନି ଗଣି
ଯେତିକି ଗଣିବା ସବୁକୁ ତ ଆମେ
ପାରିବା ଦେବତା ମଣି ।।
ବହି ଯେତେ ଅଛି କେତେ ଯେ ଭାଷାର
ପାରିବାନି ସବୁ ପଢି
ଯେତିକି ପଢିବା ତହିଁରୁ ଶିଖି ତ
ଜୀବନ ପାରିବା ଗଢି ।।
ଫୁଲ ଯେତେ ଅଛି ଗଛରେ ଲତାରେ
ସବୁ ଲାଗେ ନାହିଁ କାମେ
ଯେତିକି ତୋଳିବା ଦିଅଁଙ୍କୁ ସେସବୁ
ଦେଇ ତ ପାରିବା ଆମେ ।।
ପାଣି ଯେତେ ଅଛି ଯେଉଁଠି ବି ଥାଉ
ପିଇବାର ସବୁ ନୁହେଁ
ପିଇବାର ଯେତେ ସେତକରୁ କିଛି
ଦେଇ ତ ପାରିବା ମୁହେଁ ।।
ଫଳ ଯେତେ ଅଛି ଯାହା ଦେଖୁ ସବୁ
ସୁଆଦିଆ ଲାଗେ ନାହିଁ
ପାଟିକି ଯେତିକି ଭଲଲାଗେ ତାହା
ସବୁ ତ ପାରିବା ଖାଇ ।।
ଲୋକ ଯେତେ ସବୁ ଦେଖୁଥାଇ ନିତି
ସଭିଏଁ ନୁହନ୍ତି ଜଣା
ଦେଖିଲେ କିଛି ତ ଥିବେ ନିଜ ଲୋକ
ହେଉ ପଛେ ହାତଗଣା ।।
କଥା ଯାହା ଶୁଣୁ ସବୁତକ ନୁହେଁ
ମିଠା ମାଦକତା ଭରା
କିଛି ତ କାନକୁ ସୁଖକର ଲାଗେ
ଥାଏ ଯାହା ମଧୁଝରା ।।
କାମ ଯେତେ ଅଛି ସବୁ ନ ହେଲେ ବି
କିଛି ତ ପାରିବା କରି
ସେତକକୁ ଯେବେ ଆଦରେ କରିବା
ସୁନାମ ପାରିବା ଧରି ।।