ସୁନା ପିଲା

ଅଝଟ ଶିଶୁଟି କାନ୍ଦୁଥିଲା ଗଡି

ମାଆର ହାତକୁ ଛାଡି

ଜଣେ କିଏ ହେଲେ ଅନାଉ ନ ଥିଲେ

ଯାଉଥିଲେ ମୁହଁ ମୋଡି ।

ଗାଡି ମଟରର କେଁ କାଁ ରେ

ଶୁଭୁନଥିଲା ଶବ୍ଦ

କାହା ପାଖରେ ସମୟ ନଥିଲା

ଶିଶୁହେଲା ଶ୍ୱାସରୁଦ୍ଧ ।

ଜଣଙ୍କ ଦୃଷ୍ଟିରେ ଶିଶୁ ପଡିଗଲା

ଗାଡ଼ିରୁ ଓଲ୍ହାଇ ଗଲା

ପାଣି ବୋତଲରୁ ଅଳ୍ପ ପାଣି କାଢି

ତା ମୁହେଁ ଛିଞ୍ଚି ଦେଲା ।

ଚେତା ପାଇ ପୁଣି କାନ୍ଦିଲା ଶିଶୁ

କଣ ହେଲା ପଚାରିଲା

ଗରୀବ ମାଆଟି ଦୁଃଖରେ କହିଲା

ମାଡ ମୋଠାରୁ ଖାଇଲା ।

ଆମେ ଦୁଃଖୀ ଲୋକ କେଉଁଠୁ ଆଣିବୁ

ଆଇସକ୍ରିମ ଚକଲେଟ

ଅଝଟ ଶିଶୁକୁ ବୁଝାଇବା କଷ୍ଟ

ସେଥି ପାଇଁ କରେ ନାଟ ।

ପାଖ ଦୋକାନରୁ ଚକଲେଟ ଆଣି

ପିଲା ହାତେ ସିଏ ଦେଲା

ଅଝଟ ହେବୁନି ସୁନା ପିଲା ତୁ

ସ୍କୁଲ ଯିବୁ ବୋଲି କହିଲା ।

ଖାତାବହି ଆଉ ସ୍କୁଲ ବେଗ ଜୋତା

କାଲିକି ଆଣିବି କିଣି

ଅତି ଖୁସିରେ ପିଲା ନାଚିଲା

ତାର ପଦେ କଥା ଶୁଣି ।