ସୁଖରେ ସଂସାର କର

ଚାଲିତୁ ଯାଇଛୁ ବାଟ କାଟି ତୋର

    ହୃଦୟୁ ଯାଇନୁ ମୋର,

ଭଙ୍ଗା ହୃଦୟରେ ଆଜିବି ସାଇତା

    ରହିଛୁ ହୋଇ ନିଜର।।

ଖୁସିରେ ଗଢ଼ୁଛୁ ସଂସାର ଗୋରୀତୁ

    ମୋତେ କରିଦେଇ ପର,

ତଥାପି ହୃଦୟ ତତେଲୋ ଝୁରୁଛି

    ହୃଦୟ ବୁଝୁନି ମୋର।।

ମୋ ହୃଦୟେ ତୁହି ଆଜି ବି ରହିଛୁ

    ଥିଲୁ ତୁ ଯେପରି ଦିନେ,

ରହିଥିବୁ ସଦା    ଚିରଦିନ ପାଇଁ

    ଏକଥା ରଖିଥା ମନେ।।

ଏମିତିକା ସାଥୀ ଥିଲୁ ତୁ ମୋହର

   ଚିହ୍ନି ମୁଁ ପାରିଲି ନାହିଁ,

ପ୍ରେମ ବଦଳରେ ପ୍ରତାରଣା ଦେଇ

   ଚାଲିଗଲୁ ପର ହୋଇ।।

ସୁଖରେ ସଂସାର ଗଢୁଥା ସାଥୀ ତୁ

    ଦେଉଛି ମୁଁ ଆଶୀର୍ବାଦ,

ଜୀବନରୁ ତୋର ଦୂର ହୋଇଯାଉ

    ସବୁ ଆପଦ ବିପଦ।।