ସ୍ଥାନ
ସ୍ଥାନ
ପିତା ମାତା ମୋର ଚଳନ୍ତି ଠାକୁର
ତାଙ୍କ ସ୍ଥାନ ହୃଦାସନେ
ଜଗତ ଜୀବନ ମୋ ପରମ ଧନ
ନିବସନ୍ତି ମୋର ମନେ ।
ଶ୍ରୀପଦରେ ସ୍ଥାନ ଦେବ ହେ ଠାକୁର
ଏଇ ମୋର ନିବେଦନ
ନଆସିବି ଭଵ ଆହେ ଜୀଵଧବ
ଦୁଃସହ ଗର୍ଭ କଷଣ ।
ମାତୃଗର୍ଭ ଜ୍ଞାନ ଭୁଲିଛି ଅଜ୍ଞାନ
ଦିଅ ଥରେ ଦରଶନ
ମରତେ ଭ୍ରମିଲି ଅନେକ ସ୍ଥାନରେ
ସରିନି ନିତ୍ୟ ଭ୍ରମଣ ।
ଯେ ସ୍ଥାନେ ରହିବି ସେ ସ୍ଥାନର ମାନ
କରିବି ମୁଁ ବର୍ଦ୍ଧମାନ
ବିଦ୍ୟାଳୟେ ନେଲି ଶିକ୍ଷାର୍ଥୀର ସ୍ଥାନ
ଚାକିରୀରେ ବ୍ୟବସ୍ଥାନ ।
ପଦବୀର ସ୍ଥାନ ମାନ ସଂରକ୍ଷଣେ
ଢାଳିଦେଲି ମନ ପ୍ରାଣ
ବିଭା ହେବାପରେ ସ୍ୱାମୀ ସ୍ଥାନ ନେଲି
ସଂସାର ଚକ୍ର ବିଧାନ ।
ସନ୍ତାନ ସନ୍ତତି ହୁଅନ୍ତେ ପ୍ରାପତି
ପିତା ସ୍ଥାନ ନେଇଗଲି
ପିତା ଆସନରେ ମୂରବୀ ମର୍ଯ୍ୟାଦା
ଭାର ବୋହି ସରିଗଲି ।
ସମାଜରେ ନାଗରିକ ରୂପେ ସ୍ଥାନ
ବାର୍ଦ୍ଧକ୍ୟେ ବରିଷ୍ଠ ହେଲି
ଏବେ ଜେଜବାପ ଆସନେ ଅଧିଷ୍ଠ
ନାତିଙ୍କ ସଙ୍ଗରେ ବେଲି ।
ଆସୁଛି ସମୟ ହେ କରୁଣାମୟ
ଚିତାରେ ନେବି ମୁଁ ସ୍ଥାନ
ସେହି ସ୍ଥାନ ସତ୍ୟ ଆନ ତ ଅସତ୍ୟ
ସାହା ହୁଅ ଭଗବାନ ।