Library
ସର୍ବହରାର ଇସ୍ତାହାର
ସର୍ବହରାର ଇସ୍ତାହାର
ମୁଁ ସର୍ବହରା
ଅରକ୍ଷିତ ବେସାହାରା
ଭାତ ମୋ ପାଇଁ ଅପହଞ୍ଚ
ବସ୍ତ୍ର ଓ ବାସଗୃହ
ଦୂରନ୍ତ ସ୍ଵପ୍ନ
ସୁଖ ସଂଭୋଗ
ଜାଦୁଗରର ଇନ୍ଦ୍ରଜାଲ ।
ବୁର୍ଜ୍ଜୁଆଙ୍କ ଦ୍ଵାରା
ଚିରଦିନ ଶୋଷିତ
ଅଥଚ ସେମାନଙ୍କ
ଦୟାରେ ପ୍ରତିପାଳିତ
ସାମାଜ ଶାସ୍ତ୍ରୀ - ଅର୍ଥଶାସ୍ତ୍ରୀଙ୍କ
ପ୍ରୟୋଗଶାଳାରେ ପରୀକ୍ଷିତ
ଇଜ୍ଜତ ମହତ ମୋର
ଦୁନିଆ ଦାଣ୍ଡରେ
ସଦା ଭୁଲୁଣ୍ଠିତ ।
ମୋ ସ୍ବାର୍ଥ ସମ୍ମାନ ଉତ୍ଥାନ ପାଇଁ
କେତେ କୁସ୍ତି କସରତ
କେତେ ବାକ୍ ବିତଣ୍ଡା
କେତେ ରକ୍ତାକ୍ତ ସଂଘର୍ଷ
କେତେ ଅନୁଦାନ ପ୍ରୋତ୍ସାହନ
କେତେ ଅରଣ୍ୟ ରୋଦନ
କେତେ କୁମ୍ଭୀର କ୍ରନ୍ଦନ
ଅଥଚ ମୁଁ ଶୋଷିତ ନିଷ୍ପେସିତ
ଚିରକାଳ ଚିରଦିନ ।
ମାର୍କ୍ସବାଦ - ଲେଲିନବାଦ
ପୁଞ୍ଜିବାଦ - ସାମ୍ୟବାଦ
ସମାଜବାଦ - ଗାନ୍ଧୀବାଦ
ସାଂସ୍କୃତିକ ରାଷ୍ଟ୍ରବାଦ
ମୋ ପାଇଁ କେତୋଟି
ଦୁର୍ବୋଧ୍ୟ କ୍ଲିଷ୍ଟ ଶବ୍ଦ ପୁଞ୍ଜ ।
ବଜାରବାଦ - ଉଦାରବାଦ
ଅର୍ଥନୀତିରେ ମୁଁ
ଗୋଟେ ପଣ୍ୟ ସାମଗ୍ରୀ
ଶ୍ରମ ଶକ୍ତିର ଉତ୍ସ
ମୂଲର ବଜାରେ
ପେଟର ଭୋକ ମହଙ୍ଗା
ଅଥଚ ମଣିଷ ଖୁବ୍ ଶସ୍ତା ।
ଦେଶ ଗଢା ହୁଏ
ମୋ ରକ୍ତ ମାଂସ ସ୍ବେଦର
ଅକାତର ବଳିଦାନରେ
ମୁଁ ଖଟିଖିଆ ଦିନ ମଜୁରିଆ
ତୃତୀୟ ବିଶ୍ବର
ଅଗ୍ରଣୀ କର୍ଣ୍ଣଧାର ।
ମାନବାଧିକାର
ମୌଳିକାଧିକାରରୁ
ବଞ୍ଚିତ ଲାଞ୍ଛିତ
ମୁଁ ସର୍ବହରା
ଲଢ଼ି ଲଢ଼ି ଭାଗ୍ୟ ସହ
ବିଧି ସହ
ବଞ୍ଚିବାଟା
ମୋର ଅଧିକାର
ଏହି ମୋର ଆତ୍ମଲିପି
ସର୍ବହରାର ଇସ୍ତାହାର !
