ସର୍ବ ଭୂତେଷୁ ନାରାୟଣ

ପ୍ରତ୍ୟେକ ଜୀବର ଘଟେ ନାରାୟଣ ତାଙ୍କୁ ପାରୁନାହିଁ ଚିହ୍ନି,

ପ୍ରତିଦିନ ଯିବା ଆସିବା କରନ୍ତି ଧନ ରୂପେ ମହାଲକ୍ଷ୍ମୀ |

ପ୍ରତିକ୍ଷଣେ ବାୟୁ ଦେବତା ବାସନ୍ତୀ ଏ' ମାଟି ଘାଟରେ ମୋର,

ପ୍ରତି ଅଙ୍ଗେ ପୁଣି ଗଙ୍ଗା ବହିଚାଲେ ସଚଳ କରି ଶରୀର |

ପ୍ରତି ପ୍ରଭାତରେ ଅଗ୍ନିଦେବ ସୂର୍ଯ୍ୟ ଦେଇ ଯାଉଛନ୍ତି ତାପ,

ପ୍ରତି ମୁହୂର୍ତ୍ତରେ ଆକାଶକୁ ଚାହିଁ ଦେଖିପାରେ ବିଶ୍ୱରୂପ |

ପ୍ରତି ଧୂଳିକଣା ପ୍ରତି ଜଳବିନ୍ଦୁ ପ୍ରତ୍ଯକ୍ଷ ଦେବତା ଜାଣି,

ପ୍ରତିମୂର୍ତ୍ତି ଥାପି ପ୍ରତିହାରୀ ରାଖୀ ହେଉଛି ମୁଁ ପ୍ରତିଗାମୀ |

ପ୍ରତିକାର୍ଯ୍ୟେ ମୋର ପ୍ରତିଗ୍ରହ ଯା'ର ତାଙ୍କୁ କରି ପ୍ରତିକ୍ଷେପ,

ପ୍ରତିପତ୍ତି ମୋର କରି ପ୍ରଦର୍ଶନ ଅର୍ଜୁଛି ଅକ୍ଷୟ ପାପ |

ଅର୍ଥ : ପ୍ରତିହାରୀ- ଦ୍ଵାରପାଳ, 

ପ୍ରତିଗାମୀ- ଫେରିଯିବାକୁ ପ୍ରସ୍ତୁତ, 

ପ୍ରତିକ୍ଷେପ-ଅସ୍ଵୀକାର,

ପ୍ରତିଗ୍ରହ-ଉପହାର |