ସଞ୍ଚୟ

ସଞ୍ଚୟ ତ ଏକ ଅଭ୍ୟାସ

     ଭଲ ଗୁଣରେ ଗଣା,

ସଞ୍ଚୟ କରି ନ ପାରିଲେ

     ବାଟ ହୋଇବ ବଣା ।

ଏକ ଏକ କରି ସଞ୍ଚିଲେ

     ଦିନେ ବହୁତ ହେବ,

ବୁନ୍ଦା ବୁନ୍ଦା ପାଣି ଯେପରି

     ଭାଣ୍ଡ ପୂର୍ଣ୍ଣ କରିବ ।

ଖର୍ଚ୍ଚ ହୋଇଥିବା ଅର୍ଥକୁ

      କେବେ ଭାବିବ ନାହିଁ,

ଖର୍ଚ୍ଚର ପୂର୍ବରୁ ସଞ୍ଚୟ

      ମନେରଖିବ ତହିଁ ।

ଅଯଥାରେ ଖର୍ଚ୍ଚ କରିଲେ

      ଲକ୍ଷ୍ୟ ଯିବ ଦୂରେଇ,

ଆପଦ ବିପଦ କାଳରେ

      ରାହା ମିଳିବ ନାହିଁ ।

କେତେ ଉପାର୍ଜନ କରିଲ

      କର ନାହିଁ ହିସାବ,

କେତେ ତୁମେ ସଞ୍ଚି ପାରିଛ

      ତାହା ମନରେ ଭାବ ।

ଆଜି ସଞ୍ଚଥିଲେ କାଲିକି

       ଖର୍ଚ୍ଚ କରି ପାରିବ,

ନିଜେ ଖୁସିରହି ଆନକୁ

       ସୁଖ ବାଣ୍ଟି ପାରିବ ।

ଧନକୁ ସଞ୍ଚିଲେ ଯତନେ

       ସିଏ ରକ୍ଷା କରିବ,

ଭବିଷ୍ୟତ ଆମ ତା ଯୋଗୁଁ

       ଆନନ୍ଦରେ କଟିବ ।

ଧନ ସଙ୍ଗେ ଧର୍ମ ସଞ୍ଚିବା

      ପୁଣି ଶକ୍ତି ସଞ୍ଚୟ ,

ମୂର୍ତ୍ତିକା ସଞ୍ଚୟ ସହିତେ

      ଅରଣ୍ୟର ସଞ୍ଚୟ ।

ଜଳକୁ ସଞ୍ଚୟ କରିବା

      ପ୍ରକୃତିର ବିଭବ,

ସଞ୍ଚୟ ଅଭ୍ୟାସ ବଳରେ

       ଧରା ହସି ଉଠିବ ।