ସନ୍ତାନ

  

ଏମିତି ବନ୍ଧନ ଲାଗିଛି ସଂସାରେ

    ସୃଷ୍ଟିର ନିୟମ ହୋଇ,

ସବୁ ପରିବାରେ ଦାମ୍ପତ୍ୟ ଜୀବନ

    ଆସେ ସୁଖ ଆଶା ନେଇ |

ସବୁ ଦମ୍ପତି ଯେ ଖୋଜନ୍ତି ବାସ୍ତବେ 

    ସନ୍ତାନଟେ ଜନ୍ମ ପାଇଁ,

ଦାମ୍ପତ୍ୟ ଜୀବନ ସାର୍ଥକ ସେଥିରେ

    ମହା ସୁଖ ଥାଏ ଦେଇ |

ଜୀବନର ସବୁ ବ୍ୟଥା ଦୂର ହୁଏ

     ସନ୍ତାନ ମୁହଁକୁ ଚାହିଁ,

ସେଇ ଯେ ତାଙ୍କର ଅମୁଲ୍ୟ ସମ୍ପତ୍ତି

     ଯାହାର ତୁଳନା ନାହିଁ |

ସନ୍ତାନର ହସେ ହସ ଖେଳୁଥାଏ

     ପିତାମାତାଙ୍କର ମୁଖେ ,

ସେଇ ଯେ ଜୀବନେ ହୋଇବ ଭରସା

     ଜୀବନର ସବୁ ଦୁଃଖେ |

ଶିଶୁ ସନ୍ତାନର ଦୋତୁଣ୍ଡା କଥାରେ

     ଥାଏ ଆନନ୍ଦର ଧାରା,

ଯେତେ ସବୁ ଅଳି ସନ୍ତାନର ଥାଏ

     ହୁଅଇ ସହସା ପୁରା |

ସନ୍ତାନ ଆଖିରେ ଲୁହ ଦେଖିଦେଲେ

     କେବେ ସହିହୁଏ ନାହିଁ,

ପିତାମାତାଙ୍କର ସବୁ ଅବଶୋଷ

     ରହେ ହୃଦେ ଦାଗ ହୋଇ |

ସମୟ ସ୍ରୋତରେ ଜଣା ପଡ଼େନାହିଁ 

      ହୁଅଇ ବଡ଼ ସନ୍ତାନ,

 ଆଶା ବାଡ଼ି ହୁଏ ପିତାମାତାଙ୍କର

      ସୁଖରେ କଟେ ଜୀବନ |