ସଂଳାପ

ବିଭୋର ପଣ ର ନିଶା ରେ

ତମାମ ଜୀବନ! ମୁଁ ନାଚିଲି,

କେତେବେଳେ ନୁପୁର ବାନ୍ଧିଲି

ଆଉ କେବେ ନିଜକୁ ହଜେଇଲି............

ଶେଷରେ ମୁଁ ହିଁ ଇତି;

ଆଉ ଆସନ୍ତାକାଲି ର ଦରପୋଡ଼ା ଇତିହାସ।

ତୁମ ପାଇଁ ଯ‌ଉ

ଚିମୁଟାଏ ଚିନ୍ତାରେ ମୁଁ

ଗୋଟେ ଚକ୍ରବ୍ୟୁହ କୁ ଭେଦିବାର

ସାହସ ମନରେ ବାନ୍ଧେ

ଦେଖିବ

ଏଇ ଅଲୋଡ଼ାପଣ ହିଁ ଦିନେ

ତୁମର ଅବସୋସ ର କାରଣ ସାଜିବ।

ମୁଁ ଘିଅ ବୋଲି

ଜାଣିବା ବେଳକୁ

ବହୁତ ବିଳମ୍ବ ହେଇ ସାରିଥିଲା,

ଏବେ ମୁଁ ପୂର୍ଣ୍ଣତା ର ମନ୍ତ୍ର ରେ

ଆହୁତି ଦେଉଥିବା ଗୋଟେ ରୂପକ।

କାହାର ଏ ଝୁଣ୍ଟି ପଡ଼ିବା ର ଶବ୍ଦ

କିଏ ସେଠି ପଢ଼ୁଛି

ହାହାକାର ର ଚିଠି,

ଭରିଦିଅ ଶୂନ୍ୟତା

ମାଗିଆଣ ଧାପେ ମୁହୂର୍ତ୍ତ

ଖୋଜାପଡ଼ୁ ସାରା ରାଇଜ

ବ୍ୟାପିଯାଉ ଏକଲାପଣ ର ସଂକ୍ରମଣ।।

ଚାଲିବା ଅପେକ୍ଷା ମୁଁ

ଡେଇଁ ଯିବା ପାଇଁ ବାଧ୍ୟ ହେଲି

ଲକ୍ଷ୍ୟ ଥିଲା ମୋର ବାଟ ସାରିବା

ଝୁଣ୍ଟିପଡ଼ିବା ବେଳେ

ମୋ ଶବ୍ଦ କାହାକୁ ଛୁଇଁନି

ଶେଷରେ ମୁଁ ହାରିଯାଏ କି ହାରି ସାରିଥାଏ

ଆଉ ବୁଝା ପଡ଼େନା।

ନ‌ଈ ର ପ୍ରଖର ସ୍ରୋତରେ

ଏମିତି ଭାସିଯାଏ ମୂକ ପିମ୍ପୁଡ଼ି ଟାଏ

କ‌ଉଠୁ ଉଡ଼ି ଆସେ ବଣି

ଖୁମ୍ପି ଦିଏ କଞ୍ଚା ପତ୍ର ଟିଏ

ଶିଖାଏ ତା'କୁ ଜିଇଁବା

ଯେମିତି ଏଠି

ତମେ ଲଦିଦିଅ ମୋ ପିଠିରେ ବାରବାର

ପ୍ରେରଣା ର ଧାନପଟ ଟିଏ

ଆଉ ଝୁଙ୍କ ଲଗାଏ ମୁଁ ଗୋଟେ 

ଜୀବନ କୁ ହାତେଇବାର।।