ସମୟ

ସାରା ଜଗତରେ ସକଳ ଅନ୍ତରେ

ସମୟ ଶୁଣାଇ ନିନାଦ

ଚେତନ ପିଣ୍ଡରେ ଚେତନାକୁ ଭରି

ଘୁଞ୍ଚାଇ ପାରେ ପରମାଦ ।

ଅତି ବଳବାନ ପରା ଏ ସମୟ

କା' ଭାଗ୍ୟେ କଅଣ ଲେଖଇ

ନ ପାରଇ କହି ଏ ମରତେ କେହି

ଏକୁଟିଆ ସିଏ ଜାଣଇ ।

ଠିକ୍ ସମୟରେ ଠିକ୍ କାମ କଲେ

ବିବେକର ଅନୁମୋଦନେ

ଗୋଟେ ପରେ ଗୋଟେ ସଫଳତା ଲଭି

ସୁଖୀ ହେବ ନିଶ୍ଚେ ଜୀବନେ ।

ସମୟକୁ ଯେବେ କର ହାତଛଡା

ଦେବ ନାହିଁ କେବେ ତା' ମୂଲ

ହୋଇବ ହତାଶ ମନେ ଅବସୋସ

ଚାହିଁ ରହିବ ବଲବଲ ।

ଗତ ହୋଇଗଲେ ଆଉ ନ ଫେରଇ

ଖୋଜିଲେ ବି ମିଳଇ ନାହିଁ

ଯେତେବେଳେ ଯାହା କରିବାକୁ ଅଛି

ପୂର୍ବରୁ ଲାଗିପଡ଼ ତହିଁ ।

ସମୟ ସାଥିରେ ହସିବ ଜୀବନ 

ଦୁଃଖ ତାପକୁ ଅପସାରି

ଅତ୍ୟନ୍ତ ସୁଲଭ ଥିବ ଅଗ୍ରଗତି

ଆନନ୍ଦାନୁଭବକୁ ଧରି ।

ହସକାନ୍ଦ ଭରା ମଣିଷ ଜୀବନ

ସବୁ ଏ ସମୟର ଖେଳ

ତାକୁ ଜିତିବାର ଦୁଃସାଧ୍ୟ ଯା' ପାଖେ

ଥାଏ ବିଭୁ ଆଶିଷ ବଳ ।

କରିବାକୁ ସିନା ତା' ଗତିକୁ ରୋଧ

ସକ୍ଷମ ନୁହେଁ କେ ସଂସାରେ

ସତ୍ୟ ଧର୍ମ ନ୍ୟାୟ ସଙ୍ଗେ ଲଢ଼ି ଲଢ଼ି

ଚିହ୍ନ ରଖି ପାରେ ଦେହରେ ।

ସୁକର୍ମ କେବଳ ସଦା ତେଜସ୍କର 

ରହଇ ସମୟ ବକ୍ଷରେ

ସେଥିରେ ମନକୁ କରାଇ ନିବେଶ

ଧାଉଁଥାଅ ଲକ୍ଷ୍ୟ ପଥରେ ।।