ସମୟ ତୁ ଟିକେ ରହିଜା

ରେ ସମୟ ତୁ ଟିକେ ରହିଜା

ସରିନି ମୋ କାମ

ପାଶେ ଅଛନ୍ତି ମୋ ହୃଦୟ ରାଜା

ମନୋରଂଜନ ।

ମୋ ସଂସାର ଭାର ବଢ଼ାଇ ତା'ଙ୍କୁ

ଚଳିବି ଧୀରେ

ବୁଝାଇ କହିବି ଧୋଇବେନି ମୁଖ

ସେ ଆଖି ନିରେ ।

ରଖିବେ ସାଇତି ମନ ବଗିଚାରେ

ମୋ ସ୍ବପ୍ନ ଫୁଲ

ପ୍ରୀତି ଉପହାର ସେଇତ ଆମର

ଅମୂଲ ମୂଲ ।

ଜଗୁଆଳି ସାଜି ଦେଇ ଦାନା ପାଣି

ନେବେ ଯତନ

ପାଖୁଡାକୁ ତାର ନ ଦେବେ ହେବାକୁ

କୀଟ ଦଂଶନ ।

ସୁନ୍ଦର ଏକ ପ୍ରଜାପତି ଡେଣା ତଳେ

ଦେବେ ସଜାଇ

ପାଇ ତା ପରଶ ଖୁସିରେ ନାଚିବ 

ମଥା ହଲାଇ ।

ତେବେ ଯାଇ ମୋ ତପତ ହୃଦୟ

ହେବ ଶୀତଳ

ତୋ ସାଥେ ପାରିବି ଯାଇ ସମୟରେ

ବୁଡାଇ ବେଳ ।

ଟିକ ଟିକ ଶବ୍ଦ ତୋର ମୋ କାନେ ବାଜି

କରେ ଅସ୍ଥିର

ମୁହୂର୍ତ୍ତେ ରହିଜା ଆସୁଛି ବୁଝାଇ

ପ୍ରୀୟଙ୍କୁ ମୋର ।