ଆସ ସାଥୀ ଆସ ଆମେ ପିଲା ହୋଇଯିବା

ଆସ ସାଥୀ ଆସ ଆମେ ହୋଇଯିବା ପିଲା

ବିନା ମତଲବେ ସବୁ କରିବା ଝାମେଲା ।

ନଡ଼ିଆ ଖୋପଡିରେ ଭରି ମାଟି,ବାଲି

ଯତନେ ରାନ୍ଧିବା ଆମେ ଭାତ,ଭଜା, ଡାଲି ।

ବିଷ, ଅମୃତ ଖେଳରେ ମଜିଯିବା ସର୍ବେ

ପାଣି ,ପାହାଡ଼ ଖେଳରେ ହଜିଯିବା ଭବେ ।

ଆସ ସାଥୀ ବୋହୁ ଚୋରୀ ଖେଳକୁ ଖେଳିବା

ଖେଳକୁ ନେଇ ମିଛେ କଳି ବି ଲାଗିବା ।

ତୁ' ଦେବୁ ଠେଲି ମତେ, ମୁଁ' ଦେବି ରାମ୍ପୁଡି

ତଳେ ପଡି ସକେଇବି ଯେବେ ମୁହଁ ମାଡି ।

ତୋଳି ଧରି ବୁଝାଇବୁ ଝାଡ଼ିଦେବୁ ଧୂଳି ।

ତୋ ମିଠା ପରଶ ପାଇ ଭୁଲିବି ମୁଁ କଳି

ତୋ ହାତରେ ହାତ ରଖି ଉଠିବି ମୁଁ ଧିରେ

ନଥିବ ଶଙ୍କା , ଆଶଙ୍କା ହୃଦୟ ଭିତରେ ।

ଅଜଣା ପୁଲକେ ମତୁଆଲା ହେଉଥିବା

ମନଭରି ପ୍ରକୃତିକୁ ନିରେଖି ଦେଖିବା ।

ନଥିବ ସମାଜ ଭୟ , ନଥିବ ଆକଟ

ନଥିବ ଘୃଣା,ନଥିବ ଛନ୍ଦ କି କପଟ ।

ଗାଁ ମୁଣ୍ଡ ଗଡ଼ିଆରେ ଦେଇ ବନିସୀ କଣ୍ଟା

ପଡୁ କି ନ ପଡୁ ମାଛ ବିତୁ ଘଣ୍ଟା ଘଣ୍ଟା ।

 ବାରି ବରକୋଳି ଚୋରି କରି ଖାଉଥିବା

ଆସ ସାଥୀ ଆସ ଆମେ ପିଲା ହୋଇଯିବା ।

ଗାଁ ଦାଣ୍ଡେ ବୁଲି ବୁଲି ବାଣ ଫୁଟାଇବା

ତୁ ମୋ ପାଇଁ ମୁଁ ତୋ ପାଇଁ ଦୀପାଳି ଜାଳିବା ।

ଦିନେ ନ ଦେଖିଲେ ସାଥୀ ହୋଇବା ପାଗଳ

ଖୋଜିବା ଗଳି, କନ୍ଦି ଯେତେ ବୁଡିଯାଉ ବେଳ ।

ଆକାଶର ବୁକୁଚିରି ଜହ୍ନକୁ ଖୋଜିବା

ସୂର୍ଯ୍ୟାଲୋକେ ଲୁଚେ କିଆଁ ତାକୁ ପଚାରିବା ।

ସମୟର ଅନ୍ତରାଳେ ବଦଳେ ସେ କାହିଁ

ଦିବସେ ନ ପାଏ ଦେଖା ପ୍ରିୟା ନୀଳ କଇଁ ।

ବିରସେ କାଟଇ ଦିନ ଖୋଜି ସେହି ଜହ୍ନ

 ତା ପାଇଁ ସତେଜ ସଦା,ତା ବିହୁନେ ମଳିନ ।

ଆମେ କିନ୍ତୁ କିଏ କା'ର ହାତ ନ ଛାଡିବା

ଜନମେ ଜନମେ ସୁଖ, ଦୁଃଖ ସାଥି ହେବା ।

ଭବିଷ୍ୟର ଆଶା ନେଇ ନ ଭୁଲିବା ଅତୀତ

ବର୍ତ୍ତମାନ ହାତେ ଆମ୍ଭେ ହୋଇ କବଳିତ ।

ଜଞ୍ଜାଳ ଜାଲେ ପଡିଣ ନ ହେବା ଦୁଃଖିତ

ଅତୀତ କୁ ଖୋଜି ଆଦରିବା ଭବିଷ୍ୟତ।

ରାଗ,ରୁଷା, ଅଭିମାନେ ସୁଖ ସାଉଁଟିବା

ଆସ ସାଥୀ ଆସ ଆମେ ପିଲା ହୋଇଯିବା ।