ସମୟ ଅପେକ୍ଷା କାରଣ

ଆଜିର କାମକୁ ଆଜି କରିଦେଲେ 

        କାଲି ପାଇଁ ଆଉ ରହେନି;

କାଲି ପାଇଁ ରଖି କାମ ବଢାଇଲେ

         ବେଶି କାମ କରି ହୁଏନି ।

     ବନ୍ଧୁ ସମୟ ଅପେକ୍ଷା କରେନି ।

ଆଜିର ପାଠକୁ କାଲି ପାଇଁ ପିଲେ

         କେବେବି ତୁମେ ରଖନୀ;

ପାଠ ତ ବଢିବ ସମୟ କମିବ

         କରିଲେ ବି ତାହା ସରେନି ।

     ପିଲେ ସମୟ ଅପେକ୍ଷା କରେନି ।

ରୋଗ ଅଳ୍ପ ଦେଖି ଖାତର ନକରି

          ବେଦନାକୁ ସହି ଯାଅନି;

କାଲି ରୋଗ ବଢି ବଡ଼ ରୋଗ ହୋଇ

         ବିପଦ ସେ କାହିଁ ହେବନି ।

       ବନ୍ଧୁ ସମୟ ଅପେକ୍ଷା କରେନି ।

ସମୟ ପୁର୍ବରୁ ଜାଗାରେ ନଥିଲେ

            ରେଳ ବି ଧରା ଦିଏନି

ଗାଡି ନ ଧରିଲେ କାର୍ଯ୍ୟହାନୀ ହୁଏ

            ହୁଏ ମଧ୍ୟ ଅର୍ଥହାନୀ ।

       ବନ୍ଧୁ ସମୟ ଅପେକ୍ଷା କରେନି ।

ପଥେ ଦୁର୍ଘଟିତ ପଥଚାରୀ ଯଦି

           ସମୟେ ଚିକିତ୍ସା ହୁଏନି;

ବିଳମ୍ବ କାରଣୁ ମୃତ୍ୟୁର ଶିକାର

          କାହିଁ ପାଇଁ ସିଏ ହେବନି ।

       ବନ୍ଧୁ ସମୟ ଅପେକ୍ଷା କରେନି ।

ତୁଣ୍ଡର ଭାଷାକୁ ମଧୁର ରଖିଲେ

            ସମ୍ପର୍କ ବିନାଶ ହୁଏନି

ସମ୍ପର୍କ ଭାଙ୍ଗିଲେ ଯୋଡିହୁଏ ନାହିଁ

          ଭାଷାର ପ୍ରୟୋଗ କରନି ।

       ବନ୍ଧୁ ସମୟ ଅପେକ୍ଷା କରେନି ।

ନିଃସହାୟ ଜନ୍ମ ନିଃସହାୟ ମୃତ୍ୟୁ

           ଏକଥା କିଏ ଯେ ଜାଣିନି;

ଏକା ଆସିଅଛ ଏକା ଚାଲିଯିବା

           ମିଥ୍ୟାଗର୍ବ କେବେ କରନି ।

        ବନ୍ଧୁ ସମୟ ଅପେକ୍ଷା କରେନି ।