ସମସ୍ୟା ସହିତ ଲଢ଼ି ଜିତିଗଲେ

ବିନା ସମସ୍ୟାରେ ବିଜୟୀ ହୋଇଲେ ମୁଖେ ଫୁଟେ ସିନା ହସ,

ସମସ୍ୟା ସହିତ ଲଢ଼ି ଜିତିଗଲେ ହୋଇଯାଏ ଇତିହାସ ।

ଦୁଃଖବେଳେ କାନ୍ଦ ଲୁହକୁ ଝରାଏ ଖୁସିରେ ବି ଲୁହଝରେ,

ଦୁଃଖଲୁହ ସିନା କୋହ ଆଣିଥାଏ, ଖୁସିରେ ହୃଦୟ ଥରେ ।

ଆକାଶର ତାରା ଚିକିମିକି କରେ ଜହ୍ନଠାରୁ ବଡ଼ ସିଏ,

ଜହ୍ନ ଛୋଟହେଇ ସଭିଙ୍କର ମାମୁ ଶୀତଳ ଜ୍ୟୋଚ୍ଛନା ଦିଏ ।

ତୁଳସୀ ଗଛଟି ଗୁଳ୍ମ ହୋଇଲେ ବି ପୂଜାପାଏ ଗୁଣପାଇଁ,

କେତେ ବଡ଼ଗଛ ଅଛନ୍ତି ବଣରେ ଖୋଲା ଆକାଶକୁ ଚାହିଁ ।

ହାତୀ ଆଉ ସାପ ବଣରେ ରହନ୍ତି ସାପ କେତେ ଛୋଟ ସତେ,

ବିଷଧର ବୋଲି ସଭିଏଁ ଡରନ୍ତି ଭୟ ଜାତକରେ ଚିତ୍ତେ ।

ଗଦାର ପ୍ରହାର ହାଡ଼ ଭାଙ୍ଗିଦେଇ ଥରକରେ ମାରିଦିଏ,

କଟୁକଥା ବିଷ ହୃଦୟକୁ ଚିରି ସବୁଦିନ ମାରୁଥାଏ ।