ସ୍ମୃତି ବିଗତ ବର୍ଷର

ବିଗତ ବର୍ଷର  ସ୍ମୃତି ଅପାଶୋରା

  କରୋନାର କଳାଛାଇ

ଘୋଟି ରହିଅଛି କୁହେଳିକା ପ୍ରାୟ

  ଚନ୍ଦ୍ର ସୂର୍ଯ୍ୟ ଦିଶୁ ନାହିଁ ।

ଜୀଉଛି ମଣିଷ  ଭୟ ଓ ଆତଙ୍କେ

  ଚଳାଉଅଛି ସ°ଗ୍ରାମ

ଦୁଷ୍ଟା ସୂର୍ପଣଖା  ବଦଳାଏ ରୂପ

  ବିକଟାଳ ସେ ଭୀଷଣ ।

କରୁଛି ଦୁରାଶା  କଳ କଉଶଳ

   ଧରୁଅଛି ଛଦ୍ମବେଶ

ଛଡାଇନେବ ସେ  ଅନ୍ୟ ଅଧିକାର

   ସୁସମ୍ପର୍କ ଭୂମି ଦେଶ ।

ତ୍ରିପୁର ବିଜୟୀ  ଦାନବ ସମ୍ରାଟ

   ଅଟନ୍ତି ଭ୍ରାତ ରାବଣ

ସିଏ ପ୍ରତିନିଧି  ପ୍ରିୟ ଅନୁଚରୀ

   ହରିପାରେ ସିଏ ପ୍ରାଣ ।

ଅହଙ୍କାର ଯେବେ ଲଙ୍ଘେ କୁଳସୀମା

   ସ୍ୱର୍ଣ୍ଣ ଲଙ୍କା ହୁଏ ଚୂର୍ଣ୍ଣ

ଜଳିଯାଏ ଗର୍ବ  ପ୍ରବଳ ପ୍ରତାପ

  ଭସ୍ମ ହୁଏ ସୁଖ ସ୍ୱପ୍ନ ।

ସଟୀକାକରଣେ କଟିଅଛି ଏବେ

   ସୂର୍ପଣଖା ନାକକାନ

ଗୁହାରୀ ଶୁଣନ୍ତି ଲଙ୍କେଶ ରାବଣ

   କରିବେ ସୀତା ହରଣ ।

ବୀର ହନୁମାନ ସୀତା କରି ଠାବ

  ଫେରିବେ ବାରତା ଧରି

ବାନ୍ଧି ସେତୁବନ୍ଧ  ଭବସାଗରକୁ

  ଯିବେ ରାମ ଲଙ୍କା ପୁରୀ ।

ସକଳ ପ୍ରଚେଷ୍ଟା  ହୋଇବ ବିଫଳ

  ଅନିର୍ବାର୍ଯ୍ୟ ହେବ ଯୁଦ୍ଧ

ସତ୍ୟସନ୍ଧ ରାମ  ହୋଇବେ ବିଜୟୀ

   ରାବଣ ହୋଇବ ବଧ ।

ପ୍ରଭୁ ରାମଚନ୍ଦ୍ର  ଅଯୋଧ୍ୟାର ଗାଥା

   ମହାକାବ୍ୟ ରାମାୟଣ

ଯାବତ ଚନ୍ଦ୍ରାର୍କେ ଭାରତ ଭୂମିରେ

   ହେଉଅଛି ପାରାୟଣ ।

ହେଉ ଅବିଳମ୍ବେ  ଲଙ୍କାର ଦହନ 

   ସ୍ୱଦେଶ ପ୍ରତ୍ୟାବର୍ତ୍ତନ

କମ୍ପୁ ଦଶଦିଶ  ବିଜୟ ନିର୍ଘୋଷ

   ଜୟ ଜୟ ଶ୍ରୀ ରାମ ।