ସ୍ମରଣୀୟ ବର୍ଷ ୨୦୧୯

ଦୁଇ ହଜାର ଊଣେଇଶ ମସିହା

ଥିଲା ଘଟଣା ବହୁଳ ,

ଦେଶ ଆଉ ରାଜ୍ୟ ଲାଗି ଅଟେ ଏହା

ଭଲ ମନ୍ଦ ମିଶା ବେଳ ।

ନବୀନ ଓ ମୋଦି ପୁନଃ ନିର୍ବାଚିତ

ହୋଇଲେ ଏ ଦେଶ -ରାଜ୍ୟେ ,

ବହୁ ସମସ୍ୟାକୁ ସାମନା କରିକି

ଲାଗିଗଲେ ହିତ କାର୍ଯ୍ୟେ ।

ଜାମ୍ମୁ କାଶ୍ମୀରରୁ ତିନିଶ ସତୁରୀ

ଧାରା ଉଠାଇଲେ ମୋଦି ,

ଲାଦାଖ ସହିତ କେନ୍ଦ୍ରଶାସିତ ସେ

ଅଞ୍ଚଳ ହୋଇଛି ଆଜି ।

ଶହ ଶହ ବର୍ଷ ପ୍ରତୀକ୍ଷା ପରେଟି

ଦେଲା ନ୍ୟାୟାଳୟ ରାୟ ,

ଅଯୋଧ୍ୟାରେ ରାମ ମନ୍ଦିର ହୋଇବ

ଶୁଭିବ ଶ୍ରୀରାମ ଜୟ ।

ଇସ୍ରୋ ଚନ୍ଦ୍ରଯାନ ପ୍ରେରଣ କ୍ଷେତ୍ରରେ

ବୈଜ୍ଞାନିକଙ୍କ ଉଦ୍ୟମ ,

ପ୍ରଶଂସନୀୟ ତା' ଥିଲା ସାରା ବିଶ୍ବେ

କଲେ ସବୁ ଧନ୍ୟ ଧନ୍ୟ ।

ମୋଦିଙ୍କ ଇଶାରା ପାଇ ସେନାଧକ୍ଷ

ଶତ୍ରୁ ଦେଶେ ଆକ୍ରମଣ ,

କରି ଜଣାଇଲେ ଆମେ ସିଂହ ଶିଶୁ

ଭାଙ୍ଗି ପାରୁ ଶତ୍ରୁ ଟାଣ ।

ସୁଷମା ସ୍ୱରାଜ ,ଅରୁଣ ଜେଟଲି

ବିଜ୍ଞ ରାଜନେତା ଦୁଇ ,

ଆମ ଗହଣରୁ ଚାଲି ଗଲେ ସିନା

ଅଛି ତାଙ୍କ ଯଶ ରହି ।

ଓଡ଼ିଶାରେ 'ଫନି' କରାଳ ରୂପଟି

ଦେଖାଇଲା ମଇ ମାସେ ,

ବହୁ କ୍ଷତିଗ୍ରସ୍ତ ହୋଇଲା ଏ ରାଜ୍ୟ

ହଇଚଇ ହେଲା ଦେଶେ ।

ଗଛଳତା ,ଘରଦ୍ୱାର ଭାଙ୍ଗିଗଲା

ବିଜୁଳିକୁ ପାଣି ବନ୍ଦ ,

ଲୋକଙ୍କ ସହିତ ଜୀବଜନ୍ତୁ କଷ୍ଟ

ଦେଖି ମାଡ଼ୁଥିଲା କାନ୍ଦ ।

ମୁଖ୍ୟମନ୍ତ୍ରୀଙ୍କର ନିର୍ଦ୍ଦେଶରେ ହେଲା

ଯୁଦ୍ଧ ଭିତ୍ତିରେ ତ କାର୍ଯ୍ୟ ,

ଓଡ଼ିଶାବାସୀ ବି ସହଯୋଗ କଲେ

ଦେଖାଇଲେ ତାଙ୍କ ଧୈର୍ଯ୍ୟ ।

ଏ ବିଶ୍ବର ଶ୍ରେଷ୍ଠ ଐତିହ୍ୟରସ୍ଥଳୀ 

ଭାବେ ଗଢ଼ିବାକୁ 'ପୁରୀ' ,

ଉଚ୍ଛେଦ ପ୍ରକ୍ରିୟା ତ୍ୱରାନ୍ୱିତ ହେଲା

ବାଧା କେତେ ସାମ୍ନା କରି ।

ଲିଙ୍ଗରାଜଙ୍କର ସୌନ୍ଦର୍ଯ୍ୟକରଣ

କରା ଯାଉଅଛି ମଧ୍ୟ ,

ବିନ୍ଦୁସାଗରର ପୁନରୁଦ୍ଧାର ଯେ

କରିବା ସ୍ୱାଗତଯୋଗ୍ୟ ।

ଖୋରଧା ପାଇକ ବିଦ୍ରୋହକୁ ଶେଷେ 

ସର୍କାର ମାନ୍ୟତା ଦେଲେ ,

ରାଷ୍ଟ୍ରପତି ଆସି ଜୟୀ ରାଜଗୁରୁ

ମୂର୍ତ୍ତି ଉନ୍ମୋଚନ କଲେ ।

ଏହିଭଳି ଭାବେ ବିଗତ ବର୍ଷଟି

ଅଛି ସ୍ମରଣୀୟ ହୋଇ ,

କହୁଥିଲେ ଯେତେ କଥା ସରିବନି

ରାତି ପଛେ ଯିବ ପାହି ।