ସମ୍ପର୍କର ହାତ ଧରି

ଭାଗ୍ୟର ଆକାଶେ ଚନ୍ଦ୍ରମା ପରିକା

  ପକାଇ ପ୍ରୀତିର ଝୋଟି

ଆସିଥିଲ ତମେ ଫଗୁଣ ପ୍ରଭାତେ

  ଖୁସିର ମହକ ବାଣ୍ଟି  

ଯୋଡିଲ ମୋ ସାଥେ ସଂପର୍କର ଡୋର

  ଚାଲିଲ ଅମଡ଼ା ବାଟେ

ମଧୁମୟ ହେଲା ବେସୁରା ଜୀବନ

   ସତେକି ସୁରଭି ଛୁଟେ  

କିଛି ସ୍ମୃତି ଆଜି ଝରା ମେଘ ପରି

   ଝର ଝର ପଡେ ଝରି

କୁଆଡେ ଗଲାଣି ପୁରୁଣା ଦିନ ସେ

   ଲାଗୁଛି କାଲିକା ପରି  

ଶିହରଣ ଭରା ଏଇ ମୋ ଦୁନିଆ

  ତମକୁ ନେଇ ମୋ ଆଜି

ଥଳକୂଳ ନାହିଁ ତମକୁ ଛାଡି ଯେ

   ମାନିବାକୁ ମୁଁ ବି ରାଜି  

ଶରତର ଚାନ୍ଦ ବସନ୍ତ ମଳୟ

   ପ୍ରଥମ ବର୍ଷାର ଛୁଆଁ

ମୋ ପାଇଁ ସାଥୀ ସବୁ କିଛି ତୁମେ

  ଆଉ କିଛି ନୁହେଁ ନୂଆ  

ଜୀବନର ଚିତ୍ର ଆଙ୍କି ଚାଲିଯିବା

  ଆସ ଆମେ ଦୁହେଁ ମିଶି

ଆଗାମୀ କାଲିର ଶୁଭକୁ ମନାସି

  ଧିରେ ଧିରେ ହସି ହସି ........