ସମ୍ପର୍କ

ସମ୍ପର୍କ ସମ୍ବନ୍ଧ ଆତ୍ମିକ ବନ୍ଧନ

ଈଶ୍ୱରଙ୍କ ଅବଦାନ

ତାର ସୁମହତ୍ତ୍ୱ ମର୍ଯ୍ୟାଦା ସମ୍ମାନ

ରଖେ ସୁଧୀ ଗୁଣୀଜନ ।

ଉତ୍ତମ ସଂସ୍କାର ନୈତିକ ଆଦର୍ଶ

ବ୍ୟବହାରେ ଶାଳୀନତା

ପ୍ରତିଫଳେ କର୍ମେ ଆଚାର ବିଚାରେ

ମୂଲ୍ୟବୋଧ ମାନବତା ।

ମଣିଷ ଅଟଇ ସାମାଜିକ ପ୍ରାଣୀ

ଏକାକୀ ପାରେନି ବଞ୍ଚି

ପାଳନ୍ତି ସଜ୍ଜନ ବିଶ୍ୱାସେ କର୍ତ୍ତବ୍ୟ

ସତ୍ୟ ଧର୍ମେ ରଖି ମତି ।

ଯତ୍ନ ସହକାରେ ଲଭି ଶିକ୍ଷା ଦୀକ୍ଷା

ସଂଯମତା ଆଚରେଣ

ଅରଜେ ମଣିଷ ଜ୍ଞାନ ଅଭିଜ୍ଞତା

ବହୁ ଦିବ୍ୟ ସଦଗୁଣ ।

ସତ୍ୟ ଶାନ୍ତି ଦୟା ଭକ୍ତି ପ୍ରେମ ନିଷ୍ଠା

ସହିଷ୍ଣୁତା ବୁଦ୍ଧିମତ୍ତା

ଲଭଇ ସୁପାତ୍ର ସାହିତ୍ୟେ ଦକ୍ଷତା

ଜୀବନରେ ସୁପ୍ରତିଷ୍ଠା ।

ଉତ୍ତମ ସ୍ୱଭାବ ବିଶ୍ୱାସ ଭାଜନେ

ବୃଦ୍ଧି ପାଏ ସୁସମ୍ପର୍କ

ପ୍ରସନ୍ନ ରହନ୍ତି ସଦା ଭାଗ୍ୟ ଲକ୍ଷ୍ମୀ

ପ୍ରାପ୍ତ ହୁଏ ସ୍ୱର୍ଗ ସୁଖ ।

ଶସ୍ତା ମଣେ ମୂର୍ଖ ସମ୍ବନ୍ଧ ସମ୍ପର୍କ

ସ୍ୱ।ର୍ଥରେ ବଳାଏ ମତି

ଏଣୁ ଦୁର୍ବିସହ ଜୀବନ ଅସ୍ଥିର

ମିଳେନାହିଁ ସୁଖ ଶାନ୍ତି ।

   ------