ସମ୍ମାନ

ଅନ୍ତର ଭିତରୁ ସମ୍ମାନ ଟିକିଏ

ଦେବାକୁ ଚାହୁଁଚ ଯଦି ସତରେ

ଅନ୍ନଦାତା ମୋର କୃଷକ ଭାଇଙ୍କୁ

ସମ୍ମାନ ଜଣାଅ ସ୍ୱଚ୍ଛ ମନରେ ।

ଟାଣୁଆ ଦେହରୁ ରକତ ନିଗାଡି

ଖଟନ୍ତି ନିଇତି ଶସ୍ୟ କ୍ଷେତରେ

ସକାଳରୁ ସଞ୍ଜ ସପନ ଦେଖନ୍ତି

ଆହାର ଭରିବେ ଆମ ମୁଖରେ ।

ସମ୍ମାନ ଟିକିଏ ଦେବାକୁ ଖୁସିରେ

କୁଣ୍ଠାବୋଧ କରନାହିଁ ହୃଦରେ

ସୈନିକ ଭାଇଠୁ କିଏ ବା ବିଶ୍ୱସ୍ତ

ଭାବିକି କୁହ ତ ମୁକ୍ତ କଣ୍ଠରେ ।

ଦିନରାତି ଭୁଲି ଶୀତ ଖରା ସହି

ଜାଗ୍ରତ ରୁହନ୍ତି ଦେଶ ସୀମାରେ

ଶତ୍ରୁର ଗତିକୁ ଅବରୋଧ କରି

ଅଙ୍କୁଶ ଲଗାନ୍ତି ନିଜ ଖୁସିରେ ।

ନିରୀହ ଶ୍ରମିକ ଭାଇଙ୍କୁ ମୋହର

ସମ୍ମାନ ଜଣାଅ ସଦା ଭକ୍ତିରେ

ଗଢ଼ା ଏ ଜଗତ ସକଳ କୀରତ୍ତି

ତାଙ୍କରି ଶକତ ବାହୁ ବଳରେ ।

ଖରବର୍ଷା ଶୀତ ଖାତିର ନକରି

ପଥର ସଦୃଶ ଶିଳ୍ପୀ ସାଥିରେ

ମାଟି ପାଣି ବୋହି ଆମ ଖୁସି ପାଇଁ

ନାନା ଦ୍ରବ୍ୟ ଗଢ଼ିଥାନ୍ତି ଧରାରେ ।

ଭାବନା ବିସ୍ତାରି ଅବଦାନ ସ୍ମରି

ସମ୍ମାନ କରିବା ବିନା ଚାପରେ

ସରଗ ସମ୍ପଦ ଲଭିବା ଜୀବନେ

ଭରିବା ଆନନ୍ଦ ତାଙ୍କ ଓଠରେ ।

ସମ୍ମାନ ବିହୁନେ ଜୀବନଟା ଶୂନ୍ୟ

ସମ୍ମାନ ସମ୍ପଦ ଜୀବକାଳରେ

ଯାହା ପାଇଁ ଶାନ୍ତି ପ୍ରାପ୍ତି ଜୀବନରେ

କେମିତି ଭୁଲିବା କୁହ ତ ଥରେ ?