ସଜ ହୋଇଲେଣି ବାହୁଡା ରଥ

   ସଜ ହୋଇଲେଣି ବାହୁଡା ରଥ

   ସଜ ହୋଇଲେଣି କଳା ସାଆନ୍ତ

   ପ୍ରାବୃତ୍ତ ରାହାସ ଅଧା ରଖିଦେଇ

   ଶରଧା ବାଲିର ଶରଧା ତୁଟେଇ

   ରଥ ପରେ ରଥ ଆଗ ପଛ ହୋଇ

   ଶ୍ରୀମନ୍ଦିର ଯିବେ ଜଗତ ନାଥ

   ସଜ ହୋଇଲାଣି ବାହୁଡା ରଥ....

   ଆଡପ ମଣ୍ଡପ ଜନମ ବେଦୀ

   ପାରିଲେନି ଆଉ ପ୍ରଭୁଙ୍କୁ ବାନ୍ଧି

   ହେରାପଞ୍ଚମୀ ରେ ମାଆ ଆସିଥିଲେ

   ଅଭିମାନ କରି ଫେରି ଯାଇଥିଲେ

   ଡେରି କରିବେନି ସହଳ ଫେରିବେ

   ପ୍ରଭୁ ଦେଇଛନ୍ତି ମାଆଙ୍କୁ କଣ୍ଟ

   ସଜ ହୋଇଲାଣି ବାହୁଡା ରଥ....

   ମାଉସୀ ମାଆଙ୍କ ସେ ପୋଡପିଠା

   ଭାରି ସୁଆଦିଆ ଆହାକି ମିଠା

   ମାଉସୀ ମାଆଙ୍କ ବାଟରେ ମନ୍ଦିର

   ଅଟକିବେ ସେଠି କାଳିଆ ଠାକୁର

   ପୋଡପିଠା ଖାଇ ଖୁସି ମନ ହୋଇ

   ଆଗକୁ ବାହିବେ ତାଙ୍କରି ରଥ

   ସଜ ହୋଇଲାଣି ବାହୁଡା ରଥ...

   ଆଗରେ ଆସିବ ରାଜା ଉଆସ

   ରହିବ ଘଡିଏ ଶ୍ରୀ ନନ୍ଦିଘୋଷ

   ମାଆ ଆସିଥିବେ ବିମାନରେ ବସି

   ପ୍ରଭୁଙ୍କୁ ଦେଖିସେ ହୋଇବେତ ଖୁସି

   ଗଜପତିଙ୍କର ନଅର ଆଗରେ

   ଲକ୍ଷ୍ମୀ ନାରାୟଣ ହୋଇବେ ଭେଟ

   ସଜ ହୋଇଲାଣି ବାହୁଡା ରଥ...

   ସିଂହ ଦୁଆରରେ ରଥ ତିନୋଟି

   ଠାକୁର ରହିବେ ଚାରିଦିନଟି

   ବାହୁଡା ବାସିତ ହେବ ସୁନାବେଶ

   ପୂର୍ଣ୍ଣବ୍ରହ୍ମ ଯହିଁ ହେବେ ପରକାଶ

   ଅଧର ପଣାତ ହେବା ପରଦିନ

   ନୀଳାଦ୍ରି ବିଜୟ କରିବେ ନାଥ

   ସଜ ହୋଇଲାଣି ବାହୁଡା ରଥ.....।