ବାପା

ସରଗ ଠୁ ବଡ଼ ହୃଦୟ ବିରାଟ 

ବାପା ସୃଷ୍ଟିର କରତା 

ପାଳନ ଶାସନ ମାନ ସନମାନ

ପରିବାର ମୁଖ୍ୟ କର୍ତ୍ତା l

ଅନ୍ନ ବସ୍ତ୍ର ଦାତା ସେନହ ଶରଧା

ପଥ ପ୍ରଦର୍ଶକ ସେତ

ବୋଝ ସଂସାରରେ ବୁହାନ୍ତି ପିଠିରେ

ଦୁଃଖେ ସୁଦ୍ଧା ଆନନ୍ଦିତ l

ଦୁଃଖ କଷ୍ଟ କାଳେ ପଥର ପଡିଲେ

ଅଭିମନ୍ୟୁ ସିଏ ସିନା 

ଉପାସ ଭୋକରେ ଧନ୍ଦି ହୋଇ ସିଏ

କର୍ତ୍ତବ୍ୟରେ ଉପାସନା l

କରନ୍ତି ଆକଟ ବାହାରଟା ଟାଣ

ତୁଳା ଠୁ ନରମ ମନ

ହସି ହସାଇକି ସ୍ନେହ ତ କରିକି

ଶିଶୁର ନିଅନ୍ତି ଯତ୍ନ l

କରି ପରିଶ୍ରମ କେତେ କାମଦାମ

ପିଲା ପାଇଁ ରୋଜଗାର

ଘର ଟି ମନ୍ଦିର ବାପା କର୍ତ୍ତାଧର 

ଚିନ୍ତା ସେବା ପରିବାର l

ଯାନି ଓ ଯାତରା ଆନନ୍ଦରେ ଭରା

ପିଠା ପଣା ହସ ଖୁସି

ବାପାଙ୍କ କୃପାରେ ପର୍ବ ପର୍ବାଣୀରେ

ବନ୍ଧୁ ପ୍ରେମେ ହସା ହସି l

ଘରର ମଙ୍ଗଳ କରନ୍ତି ସକଳ

ନିଃସ୍ୱାର୍ଥ ସେବକ ବାପା

ଘର ମରାମତି ଖଟି ଦିନରାତି

ତ୍ୟାଗର ପୂଜାରୀ ବାପା l

ହାତ ଧରି ପଥ ପାରି କରେ ସେତ

ଜୀବନେ ସାହା ଭରସା

ଦେଇ ପରାମର୍ଶ କର୍ମେ ଆକର୍ଷିତ

ସୁକର୍ମ ପାଇଁକି ଆଶା l

ହୃଦୟ ବିଶାଳ ସଦା କ୍ଷମାଶୀଳ

ବଦ ଗୁଣେ ବଦ ରାଗି

ଉତ୍ତମ କାମନା ସର୍ବଦା ଭାବନା

ସନ୍ତାନ ପ୍ରଗତି ଲାଗି l

 ଆମ ପିତା ମାତା ଚଳନ୍ତି ଦେବତା 

ଭକ୍ତିରେ କର ପୂଜନ

ଶେଷ ସମୟରେ ତାଙ୍କରି ସେବାରେ

ଉତ୍ସର୍ଗ କର ଜୀବନ ।