ସୀମାରୁ ଆସିଛି ଚିଠି

ପୁଅ ଲେଖିଥିଲା ଚିଠିଟେ ମାଆକୁ

ରକତକୁ କରି କାଳି

କାନ୍ଦିବୁନି କେବେ ମୋ ପାଇଁ ମାଆ ଲୋ

ଲୁହ ଦେବୁ ନାହିଁ ଢାଳି ।

ଭାରତ ମାତାର ସୁରକ୍ଷା ପାଇଁକି

ଚାଲିଗଲେ ମୋର ପ୍ରାଣ

ଛାତିରେ ପଥର ସାଜି ସହିଯିବୁ

ଦେଉଛି ତୋତେ ଲୋ ରାଣ ।

ଫେରିବା ବାଟକୁ ଚାହିଁବୁନି ମୋର

ଦୁଃଖ ସବୁ ସହିଯିବୁ

ଶହିଦ ପୁଅର ମାଆଟିଏ ବୋଲି

ଗର୍ବ ପରା କରୁଥିବୁ ।

ମୁଁ ପରା ସନ୍ତାନ ଭାରତ ମାତାର

ଦେଶ ପ୍ରେମ ଦୀପ ଜାଳି

ହସି ହସି ପରା ସେହି ମାଆ ପାଇଁ

ଦେଇପାରେ ପ୍ରାଣ ବଳି ।

ଜୀବନକୁ ମୋର ଭରଷା ନାହିଁ ମା'

ଆଶା ମୋର ଛାଡି ଦେବୁ

ମୋ ଭାଗ୍ୟରେ ଯଦି ଥିବ ସେହି ଦିନ

ଆଉ ଥରେ ଭେଟ ହେବୁ ।

ଶହିଦ ହୋଇଲେ ତୋର ଏହି ପୁଅ

ଝରାଇବୁ ନାହିଁ ଲୁହ

ମୋ ଯୋଗୁଁ ସୁରକ୍ଷା ପାଉଥିବେ ପରା

କୋଟି କୋଟି ଦେଶ ପୁଅ ।

ଛବି ମୁଁ ତୋହର ରଖିଅଛି ସାଥେ

ଶେଷ ଦରଶନ ପାଇଁ

ମୋ କଥାକୁ ଭାବି ଘରର କୋଣରେ

ଲୁଚି ତୁ କାନ୍ଦିବୁ ନାହିଁ ।

ପ୍ରଶାନ୍ତ କୁମାର ନାଥ

ସୁନ୍ଦରପୁର,ଉତ୍ତରକୂଳ ହାଟ୍, ପ୍ରୀତିପୁର,ଯାଜପୁର