ନୀରବ ପ୍ରେମ

ଶରଧାରେ ଲେଖିଥିଲି

ପ୍ରେମ ଚିଠି ତୋତେ,

ପଢି ସାରି ଚିରିଦେଲୁ

ଗୋରୀ ନିଜ ହାତେ ।

ହଅଁ ନାହିଁ କହିଲୁନି

ରହିଲୁ ନୀରବ,

କେମିତି ଜାଣିବି ପ୍ରିୟା

ତୋ ମନର ଭାବ ?

ଦେଖିଲେ ମୁରୁକି ହସି

ଯାଉଅଛୁ ଚାଲି,

କିଛି ବାଟ ଗଲା ପରେ

ଚାହୁଁଛୁ ତୁ ବୁଲି।

ତୋ ହାତରେ ମେହେନ୍ଦୀରେ

ଲେଖିଛୁ ମୋ ନାମ,

ବୁଝିପାରୁନାହିଁ ଗୋରୀ

କେମିତି ତୋ ପ୍ରେମ ?

କାହାକୁ ଡରୁଛୁ ଯଦି

କହ ଖୋଲି ମୁହଁ,

ତୋ ପାଇଁ ମୁଁ ଲଢ଼ିଯିବି

ଏ ଦୁନିଆ ସହ ।

ବଦନାମ ଭୟ ଯଦି

ଅଛି ତୋର ମନେ,

ବାହା ବେଦୀ ସଜ କରି

ନେଇଯିବି ଦିନେ ।

ଆଉ ଯଦି ପାଉ ନାହୁଁ

ମୋତେ ଭଲ ତୁହି,

କହିଦେ ଲୋ ମୁହଁ ଖୋଲି

ଯିବି ଦୂର ହେଇ ।

ପଡିବିନି ତୋ ପଛରେ

ଭୁଲିଯିବି ତୋତେ,

ଭାବିନେବି ଏହା ବୋଧେ

ଲେଖା ମୋର ହାତେ ।