ଶ୍ୟାମ ପ୍ରେମେ ରାଧା ବାଇ
ଶ୍ୟାମ ପ୍ରେମେ ରାଧା ବାଇ
ରାଧା ପ୍ରେମେ ଶ୍ୟାମ ପାଗଳ ହୋଇଛି
ଶ୍ୟାମ ପ୍ରେମେ ରାଧା ବାଇ
କାହ୍ନାର ସାନିଧ୍ୟ ପାଇବାକୁ ରାଧା
ବିକିବାକୁ ଯାଏ ଦହି ।
ନନ୍ଦପୁଅ ବଡ ନଟ ଖଟିଆ ଲୋ
ବାଟ ଜଗି ବସିଥାଏ
ବାଟୁଳି ମାରି ସେ ଗୋପାଳୁଣୀଙ୍କର
ଦହି ହାଣ୍ଡି ଭାଙ୍ଗିଦିଏ ।
ରାଧାରାଣୀ ସିନା ତୋଫା ଗୋରୀଟିଏ
କାହ୍ନା ଦେହ ରଙ୍ଗ କଳା
ଯଶୋଦା ମାତାର ଗଣ୍ଠିଧନ ସିଏ
ରାଧିକା ନୟନ ତାରା ।
ନିଜ ହୃଦୟରେ ରାଧିକା ରୂପକୁ
ସାଇତି ରଖିଛି କାହ୍ନା
କାହ୍ନେଇ ପ୍ରେମରେ ଉବୁଟୁବୁ ରାଧା
ସ୍ୱାମୀ ତାର ଚନ୍ଦ୍ରସେଣା ।
ଗୋପପୁର ସାରା ଟୁପୁରୁ ଟାପର
ରାଧାକୃଷ୍ଣ ପ୍ରେମ ପାଇଁ
ସ୍ୱାମୀ ଥାଉ ଥାଉ ଭଣଜାକୁ ମନ
ଦେଇଛି ରାଧିକା ମାଇଁ ।
ଶାଶ୍ୱତ ପ୍ରେମର ଶାଶ୍ୱତ କାହାଣୀ
ରାଧା କୃଷ୍ଣ ପ୍ରେମକଥା
ପ୍ରକୃତି ପୁରୁଷ ରାଧା ଦାମୋଦର
ପାଦେ ନୁଆଁଉଛି ମଥା ।