ଶୂନ୍ୟ ମାତୃତ୍ଵ

ନୂତନ ଅତିଥିର 

ଆଗମନ ସଙ୍କେତରେ

ମନରେ ଖେଳିଥିଲା 

ନୂତନ ଶିହରଣ ,

ଅହେତୁକ ଆନନ୍ଦ ଆଉ

ଶୁଷ୍କ ଓଠରେ ଢେଉ ଖେଳୁ ଥିଲା

ହସର ଜୁଆର ।

ଶରୀରେ ଭରିଥିଲା 

ନୂତନ ଉନ୍ମାଦନା ।

ଆଖି ବୁଡ଼ି ଯାଇଥିଲା ,

ଭାବନାର ଅତଳ ଗଭୀର

ସମୁଦ୍ରର ଜଳରାଶିରେ ।

ତୋର କୋମଳ ସ୍ପର୍ଶର ଯାଦୁରେ

ହଜେଇ ଦେଲା,

ପାଇଥିଲା ନୂତନ

ପରିଚୟ ମାତୃତ୍ଵର ।

ଦରୋଟି ଓଠର ହସ

କୁଆଁକୁଆଁ କାନ୍ଦରେ

ହସର ଲହରୀ ଖେଳିଯିବା

ପୂର୍ବରୁ ଜଡ ନିର୍ଜୀବ ସଜେଇଲୁ ?

କ'ଣ ପାଇଁ ଆସି ପୁଣି 

ହଜିଯାଉଛୁ ?

ଲୁଚକାଳି ଖେଳିବାର

 କି ମଜା ପାଉଛୁ ?

 ଭାବିଛୁ କି ଥରେ 

 ତୋର ଅନୁପସ୍ଥିତିର

 କଷ୍ଟ କେତେ ଯେ ଯନ୍ତ୍ରଣା ଦାୟକ ?

 ଚୋର ମାଆ କାନ୍ଦେ ନାହିଁ

 ଯଦି କାନ୍ଦେ ଦୁଆର ଦେଇ, 

 ତା'ର ଶବ୍ଦ କିଏ ଶୁଣିପାରେ 

 ନା କାହାକୁ ଶୁଣାଇବାକୁ ଦିଏନି ।

କାହିଁକି ବାରବାର ଏମିତି ଆସି ବିଜୁଳି କନ୍ଯା ଭଳି 

ଉଭା ହେଇଯାଉଛୁ

କେଉଁ ଅଦୃଶ୍ୟ ଇଲାକାରେ ?

ଭାବିଛୁ କେବେ ତୁ

 ମା'ର କୋଳ ଶୂନ୍ୟ କଲା ପରେ

 କେମିତି ବିତୁଛି 

 ତା ଉପରେ ଏ ଅସ୍ପଷ୍ଟ ଯନ୍ତ୍ରଣା ?

ରାତି ପାହିଲେ ରାମ ରାଜା ହୋଇଥାନ୍ତେ ,

କ୍ଷଣିକ ମଧ୍ୟରେ 

ସବୁ ଓଲଟ ପାଲଟ ହୋଇଗଲା

ଆଉ କିଛି ଦିନ ପରେ ପାଇଥିବା ଅସୀମ ପରିକଳ୍ପନା 

ପାଣି ଫୋଟକା ପରି ଲୀନ ହୋଇଗଲା ।

ଫୁଟିବା ଆଗରୁ ମଉଳି ଗଲୁ

ଶୁଣିଥିଲି ସବୁ ଫୁଲ ଫୁଟି

ଦେବତାଙ୍କ ଶିରେ ଲାଗି ହୁଏନି

ହଁ .. ଆଜି ନିଜ ଅନୁଭବ କରି ପାରୁଛି

ବୋଧେ ଗଛର ଗୁଣ ପାଇଁ

କଢ଼ରୁ ମଉଳି ଗଲୁ ।