ଶୂନ୍ୟ (0)
ଶୂନ୍ୟ (0)
ସୌଭାଗ୍ୟଲକ୍ଷ୍ମୀ ଆଚାର୍ଯ୍ୟ
ଆଦ୍ୟରୁ ରେଖା ଟାଣି ଏକ ସରଳ ବୃତ୍ତାକାରାରେ ଅନ୍ତ-
ବିଯୋଡ ‘ନବମ’ ସଂଖ୍ୟା ଓ ଏକ ଯୋଡର ଆଧାର
ତନ୍ମଧ୍ୟରେ ସ୍ଥିତ ଏହି ଅସିମ,ଅନନ୍ତ –
ଶୂନ୍ୟ,ମହାଶୂନ୍ୟର ଉପନିଷଦ,ବେଦାନ୍ତ !
ସକାଳର ଅନୁରିମା ଛିଟା
ପ୍ରଦୋଷର ପରାଜିତ ରଙ୍ଗରେ ଭିଜା ଶୀତଳ ଶୋଣିତ
ନୀଳ ହ୍ରଦର ଅସିମ ଶାନ୍ତିରେ ସୁପ୍ତ
ସାଗର ଲହରୀର ତାଣ୍ଡବରେ ହୃତ
ନୀଳ ଆକାଶର ରିକ୍ତତାରେ ରିକ୍ତ
ଛାୟା ପଥର କୁହେଳିରେ ବିସ୍ତ୍ରୁତ
ତନ୍ମଧ୍ୟରେ ଏ ଶୂନ୍ୟ ମହାଶୂନ୍ୟ –ବିଶାଳତାରେ ବ୍ୟସ୍ତ l
ଚପଳ ନାୟିକା-ଚଞ୍ଚଳ ଚାହାଣିର ଛଟା
‘ପ୍ରେମ’ ଓ ‘ମୋହ’ ମଧ୍ୟେ ସଂଙ୍କିର୍ଣ୍ଣତାର ଜୁଆର ଭଟ୍ଟା
ସମ୍ପର୍କର ଚଉମୁହାଣିରେ,ସଙ୍କଳ୍ପର ବୃକ୍ଷରାଜି ଗହଣରେ
ପତ୍ର ସବୁ ଝଡୁଥାଏ, ସମୀରଣ ପ୍ରବାହରେ
ପାଗ ପରିବର୍ତ୍ତନ ସନ୍ଦେଶ ଅନୁଠା l
ଭଗ୍ନ,ଭାରୀ ହୃଦୟର ନିଃସଙ୍ଗତା
‘ମନ’ ଓ ‘ବିବେକ’ ଦ୍ଵନ୍ଦ –ନାଃ ଯେ ବିରାମ
କିଏ ଦେଖେ ଚକାଡୋଳା ,
କାହା ପାଇଁ ସେ କୃଷ୍ଠବିବର-
ତନ୍ମଧ୍ୟରେ ସବୁ ଶୂନ୍ୟ-ମହାଶୂନ୍ୟ l
ସ୍ଵାର୍ଥର ମଞ୍ଚରେ ଭାବନାର କ୍ରିଡା
ତର୍କ ଯାଏ ସୀମିତ ଯେ ଜ୍ଞାନ
ପ୍ରକୃତି ସହ ଲଢୁଥାଏ, ଅସଫଳ ବିଜ୍ଞାନ l
ନିରୀହ ଜନତାଙ୍କ ଶବ ପରେ ଊଡେ
ରାଜନୀତି ପତାକା
‘ଉପ୍ତତ୍ତି’,ପ୍ରଗତିର ନାମେ
ପରମାଣୁ ଧମାକା l
ଏବଂ ତା’ପରେ ସବୁ ଶୂନ୍ୟ-ମହାଶୂନ୍ୟ l
ଆତ୍ମା’ ଖୋଜୁଥାଏ ‘ପରମାତ୍ମା’
ଲକ୍ଷ୍ୟରେ ବାରମ୍ବାର ପଥଭ୍ରଷ୍ଟ ହେଉଥାଏ
ଆସ୍ଥା ଓ ବିଡ଼ମ୍ବନା ଭିଡ଼ ମଧ୍ୟରେ
ଖୋଜୁଥାଏ ଏକ ‘ଶୂନ୍ୟ’
ଅନ୍ୟ ଏକ ‘ଶୂନ୍ୟ’ l