ବାଳି ମୋକ୍ଷ

ବସୁମତୀ ଭାରା ଉଶ୍ୱାସ ନିମନ୍ତେ

    ଚତୁର୍ଦ୍ଧା ମୂରତି ରୂପେ l

ଶ୍ରୀରାମ ,ଲକ୍ଷ୍ମଣ, ଭରତ, ଶତ୍ରୁଘ୍ନ

   ରଘୁବଂଶେ ଜନ୍ମି ଆପେ ll

ବନବାସ ବେଳେ ରାବଣ ହରିଲା

   ମାୟାରେ ସତୀ ସୀତାଙ୍କୁ l

ଜଟାୟୁ ଉଦ୍ଧରୀ କବନ୍ଧ ନିବାରି

    ମିଳିଲେ ରାମ ହନୁ ଙ୍କୁ ll

ପ୍ରଭୁଙ୍କ ଦର୍ଶନ ପାଇ ହନୁମାନ

    ଶକତି ଫେରି ପାଇଲା l

କାନ୍ଧରେ ବସାଇ ଶ୍ରୀରାମ ଲକ୍ଷ୍ମଣ

    ସୁଗ୍ରୀବ ପାଶେ ମିଳିଲା ll

ଅଗ୍ନି ସାକ୍ଷୀ ରଖି ମଇତ୍ର ବସିଲେ

     ବେନିଜନେ ଏକ ଦଶା l

ବାଳିର ଚରିତ୍ର ସୁଗ୍ରୀବଠୁ ଶୁଣି

     ବଧିବେ ଲାଗିଲା ନିଶା ll

ସମ୍ମୁଖ ଯୁଦ୍ଧରେ ବାଳି ବଳବାନ

      ଶତ୍ରୁର ଅର୍ଦ୍ଧେକ ବଳ -

ହରଣ କରିବା ଆଶୀର୍ବାଦ ଅଛି

     ବଢିଯାଏ ତାର ବଳ ll

ବର ସେ ପାଇଛି ସପତ ତାଳକୁ

    ଏକ କାଣ୍ଡେ ଯେ ଛେଦିବ l

ତାହାର ହାତରେ ବଳବାନ ବାଳି

     ନିଶ୍ଚୟ ବିନାଶ ହେବ ll

ସୁଗ୍ରୀବର ବୀର ଘେନିଲେ ସଙ୍ଗରେ

     ରାମ ଲକ୍ଷ୍ମଣଙ୍କୁ ସେଥି l

ଏକା କାଣ୍ଡକରେ ରାମ ରଘୁବୀର

     ସପ୍ତତାଳ ଛେଦି ଗୁନ୍ଥି ll

ବିଚାର କରିଲେ ଯୁଦ୍ଧକୁ ପେଶିବେ

    ସୁଗ୍ରୀବଙ୍କୁ ବାଳି ପାଶେ l

ଶୁଣି ସୁଗ୍ରୀବ ର ଚଳିଲା ସତ୍ୱର

   ସିଂହଦ୍ୱାରେ ରଣ ଘୋଷେ ll

ଡାକରା ଯୁଦ୍ଧର ପାଇ ବାଳି ବୀର

    ନଗ୍ରରୁ ବାହାର ହେଲା l

ସୁଗ୍ରୀବର ପାଇ ତାତ୍ସଲ୍ୟେ ହସଇ

    ଅକ୍ଳେଶେ ପରାସ୍ତ କଲା ll

ପରାଜୟ ଗ୍ଲାନି ସୁଗ୍ରୀବର ଘେନି

    ଶ୍ରୀରାମ ପାଶେ ମିଳିଲା l

ପୁନର୍ବାର ରାମ ଯୁଦ୍ଧକୁ ପେଶିଲେ

   ଗଳେ ଦେଲେ ପୁଷ୍ପମାଳା ll

ବେନି ଭାଇଙ୍କର ସ୍ୱରୂପ ଯେ ଏକ

    କେବଳ ମାଳା ସଂକେତ l

ଦୂରୁ ଥାଇକରି ଶ୍ରୀରାମ ଦେଖିଲେ

    ମନେ ହେଲେ ହରଷିତ ll

ସୁଯୋଗକୁ ଦେଖି ଦିବ୍ୟ ଅସ୍ତ୍ର ଯୋଖି

    କାଣ୍ଡେକ କଲେ ପ୍ରହାର l

ବକ୍ଷେ ତୀକ୍ଷ୍ଣ ବାଣ ଭେଦେ କପିରାଣ

     ଟଳିପଡିଲା ଧରାର ll

ଧାଇଁଗଲେ ରାମ ବାଳିର ନିକଟେ

    କରଯୋଡ଼େ କପିସାଇଁ l

ଆହେ ପରଂବ୍ରହ୍ମ ମୁଁ ଅତି ଅଧମ

     କପଟ କଲ କିମ୍ପାଇ ll

ଘେନ ମୋର ପ୍ରାଣ ଆପଣା ଭୁବନ

     ମୋକ୍ଷ ଦିଅ ପ୍ରଭୁ ବାରେ l

କିଛି ଉପଦେଶ ଘେନ ହେ ଶ୍ରୀରାମ

     ଲାଗିବ ତୁମ କର୍ମରେ ll

ଉପଦେଶ କହି ପ୍ରାଣ ଛାଡି ଦେଇ

     ମିଶିଲା ପ୍ରଭୁଙ୍କ ହୃଦେ l

ଉଦ୍ଧାର କରନ୍ତି ଜଗତ କରତା

    ସଂସାର ଥିଲେ ପ୍ରମାଦେ ll