ଶୁଖିଲା ପତ୍ର

ଶୁଖିଲା ପତ୍ର ମୁଁ ଥୁଣ୍ଟା ଗଛଟିରେ

ଶୋଭା ପାଏ ସ୍ୱର୍ଣ୍ଣ ରଙ୍ଗେ

ସରି ଆସିଲାଣି ଆୟୁଷ ମୋହର

ତଥାପି ମୋହ ନ ଭାଙ୍ଗେ ।

ସରିଲାଣି ମୋର ଯୌବନର ବାସ

ସବୁଜିମା ଗଲାଣି ଚାଲି

ଯେଉଁ ପତ୍ର ଦିନେ ଛାଇ ଦେଉଥିଲା

ଆଜି ସେ ଅଲୋଡା ଖାଲି ।

ଶୀତ ସକାଳର କାକର ବିନ୍ଦୁରେ

ଥରୁଛି ମୁଁ ଥିରି ଥିରି

କୋମା ଅବସ୍ଥାରେ ଲାଗିଛି ବୃକ୍ଷରେ

ପାରୁନି ଚିତ୍କାର କରି ।

କେବେ ଫେରିଯିବି ମୋ ମାଆ କୋଳକୁ

ଅଛି ଏବେ ଅପେକ୍ଷାରେ

ସୁଦୀର୍ଘ ଯନ୍ତ୍ରଣା ଅନ୍ତ ହୋଇଯିବ

ଶୋଇଯିବି ନିଶ୍ଚିତରେ ।