ଶୁଭ ଦୀପାବଳି

ଶୁଭ ଦୀପାବଳି ଆଲୋକର ପର୍ବ

ସଭିଙ୍କୁ ଜଣାଏ ଶୁଭକାମନା,

ସୁଖ,ଶାନ୍ତି,ସମୃଦ୍ଧି ଜୀବନେ ମିଳୁ

ସମସ୍ତଙ୍କ ପୁରୁ ମନୋକାମନା ।

ପ୍ରତି ହୃଦୟରୁ ଅନ୍ଧକାର ହରି

ଜଳାଅ ମଣିଷ ପଣିଆ ଦୀପ,

ଲୋପପାଇ ଯାଉ ଅଧର୍ମ, ଅସତ୍ୟ

ହିଂସା, ଦ୍ୱେଷ, ଈର୍ଷା ସକଳ ପାପ ।

ସଳିତାଟି ଜଳି ଆଲୋକ ଦେଖାଏ

ପରୋପକାର ର ଶିକ୍ଷା ଟି ଦିଏ,

ଦୀପ ର ଆଲୋକ ଉଜ୍ଜ୍ୱଳତାସହ

ହୃଦେ ଭରୁ ସଦ୍ ଭାବନା ଟିଏ ।

ପରିବର୍ତ୍ତନ ଶୀଳ ଦୁନିଆ ରୀତି

ତଥାପି ରହିବ ସ୍ଥିର ସଂସ୍କୃତି,

ଅନ୍ଧବିଶ୍ୱାସ ଓ ଅଜ୍ଞାନ ହଟିଲେ

ସଂସ୍କାର ପଥରେ ମିଳେ ପ୍ରଗତି ।

ଲକ୍ଷ ଲକ୍ଷ ଟଙ୍କା ବାଣ ହୋଇ ଫୁଟେ

କାହା ଘରେ ହେଉଛି ପୁଷମାସ,

ଲୁହ ପୋଛି ଦେଇ ଦୁଃଖ ଦୂର କରି

ଅଭାବି ମୁହଁରେ ଫୁଟାଅ ହସ ।

ଦରିଦ୍ର ନାରାୟଣ ସେବା କରିଲେ

ଯଥାର୍ଥ ଅର୍ଥରେ ଦୀପାଳି ପର୍ବ,

ଶ୍ରୀ ଗଣେଶ ମାଲଷ୍ମୀ ପୂଜା ପାଇବେ

ମନୋରଥ ନିଶ୍ଚେ ପୁର୍ଣ୍ଣ ହୋଇବ ।

ଅଧର୍ମ ତମସା ଦୁରୀଭୂତ ହେଲେ

ରାମରାଜ୍ୟ ନିଶ୍ଚେ ଫେରି ଆସିବ,

ଅଜ୍ଞାନ ରୂପକ ଅନ୍ଧକାର ଘୁଞ୍ଚି

ଜ୍ଞାନଦୀପାଳି ସଦା ଜଳୁଥିବ ।