ଶରତ ଆଗମେ
ଶରତ ଆଗମେ
ଶରତ ଆଗମେ ଆକାଶ ନିର୍ମଳ
ଧରାଟି ସୁନ୍ଦର ଦିଶେ
ନଈ ପଠା ଧାରେ କାଶତଣ୍ଡୀ ଫୁଲ
ପବନେ ଦୋହଲି ହସେ ।
ପରିବେଶ ଆମ ସ୍ବଚ୍ଛ ଓ ସୁନ୍ଦର
ବିଲରେ ସବୁଜ ଧାନ
ଚାଷୀ ଭାଇ ଦେଖି ହେଉଥାଏ ଖୁସି
ଆନନ୍ଦେ ବିଭୋର ମନ ।
ଅପରାଜିତାଟି ବାଡ ଦେହେ ମାଡି
ସୌନ୍ଦର୍ଯ୍ଯରେ ଶୋଭା ପାଏ
ଏତେ ଫୁଲ ତାର ଦେହେ ଫୁଟି ଥାଏ
ତନୁ ମନ ମୋହି ନିଏ ।
ରଙ୍ଗ ବେରଙ୍ଗର ଅନେକ କୁସୁମ
ଫୁଟି ହସେ ଧରା ଦେହେ
ସରସୀରେ ଫୁଟି କୁମୁଦିନୀ ହସେ
ଚନ୍ଦ୍ରମା ମନକୁ ମୋହେ ।
ଝିପି ଝିପି ବର୍ଷା କେବେ ଝରୁଥାଏ
ଆକାଶେ ବିଜୁଳି ମାରେ
ଜଗତ ଜନନୀ ମାଆ ଦଶଭୂଜା
ବିଜେ ଏଇ ମର୍ତ୍ତ୍ୟ ପୁରେ ।
ଅଗ୍ରପୂଜ୍ୟ ଆମ ଶ୍ରୀଗଣେଶ ପୂଜା
ଶରତ ଆଗମେ ହୁଏ
ନୂଆଖାଇ ପର୍ବ ତା ପରଦିନ
ଧୁମ୍ ଧାମରେ କରା ଯାଏ ।
ଖୁଦୁରୁକୁଣୀରେ ଭାଲୁକୂଣୀ ପୂଜା
ଝିଅ ବୋହୂ କରିଥାନ୍ତି
ମାଆ ମଙ୍ଗଳାଙ୍କୁ ସୁମରଣା କରି
ବ୍ରତ ସମାପନକୁ କରନ୍ତି ।
କୁମାର ପୂର୍ଣ୍ଣିମା ପାଳନ କରନ୍ତି
କୁମାର ଜହ୍ନକୁ ନେଇ
ଚନ୍ଦ୍ରମା ପରି ସେ ସୁନ୍ଦର ବରଟେ
ମନରେ ମନାସି ଥାଇ ।
ରୋଗ ବ୍ୟାଧିରୁ ଯେ ଆରୋଗ୍ଯ ହେବାକୁ
ଜହ୍ନି ଓଷା କରାଥାଏ
ଯିଏ ଯାହା ମନା ସେ ସେଇ ଫଳ ପାଏ
ସେହି ନିଶ୍ଚେ ପାଇଥାଏ ।
ଦୁଇଟି ମାସକୁ ନେଇ ଏ ଶରତ
ଧରା ପୃଷ୍ଠେ ଆଗମନ
ଗୋଟି ମାସ ତ ଭାଦ୍ରବ ଆମର
ଗୋଟିଏ ହୁଏ ଆଶ୍ବିନ ।
ଶରତ ଆଗମେ କାଶତଣ୍ଡୀ ଫୁଲେ
ବସୁନ୍ଧରା ହସୁଥାଏ
ମାଆର ଆସିବା ପଥକୁ ଚାହିଁ ସେ
ବିଜୟ ସଙ୍ଗୀତ ଗାଏ ।