ଶ୍ରେଷ୍ଠ ସନ୍ନ୍ୟାସୀ ବିବେକାନନ୍ଦ
ଶ୍ରେଷ୍ଠ ସନ୍ନ୍ୟାସୀ ବିବେକାନନ୍ଦ
ଶିଷ୍ୟ ନରେନ୍ :
"ଆମ ପୁରାତନ ପରମ୍ପରା କହେ
ମନୁଷ୍ୟ ଜୀବନ ଲକ୍ଷ୍ୟ,
ଧର୍ମ-ମୋକ୍ଷ-ଅର୍ଥ-କାମ, ଚତୁଃବର୍ଗ
ପ୍ରାପ୍ତି ପାଇଁ ସଦା ରତ ।
ଚତୁଃବର୍ଗ ପ୍ରାପ୍ତି ପାଇଁ ନର ହୁଏ
ଚାରୋଟି ପର୍ଯ୍ୟାୟ ପାରି ,
ବ୍ରହ୍ମଚାରୀ,ଗୃହୀ, ବାନପ୍ରସ୍ଥୀ, ଯୋଗୀ
ଧରମ ପାଳନ କରି ।
ସନ୍ନ୍ୟାସ ଧର୍ମରେ ମୋକ୍ଷ ପ୍ରାପ୍ତି ପାଇଁ
ତେଜି ଗୃହ ପରିଜନ,
ଅରଣ୍ୟେ କଠିନ ତପ ସାଧନାରେ
ସମାଧୀରେ ହୁଏ ଲୀନ ।
ଆହେ ଗୁରୁଦେବ! ଦିଅ ଆଶୀର୍ବାଦ,
ପାଏ ନିର୍ବିକଳ୍ପ ସିଦ୍ଧି,
ପରମାତ୍ମା ସହ ଲୀନ ହେଉ ଆତ୍ମା
ଲଭେ ମୁଁ ମୋକ୍ଷ ସମାଧି ।"
ଗୁରୁ ରାମକୃଷ୍ଣ :
"ପ୍ରିୟ ଶିଷ୍ୟ ବୋଲି ତୁମଠାରେ ମୁହିଁ
ରଖିଅଛି ଉଚ୍ଚ ଆଶ ,
ନିଜ ମୁକ୍ତି ପାଇଁ ବ୍ୟାକୁଳ ହେଉଛ
ହୀନ ତୁମ ଆଦରଶ ।
ଜାଗତିକ ସୁଖ ତେଜି, ନିଜ ମୁକ୍ତି-
ସାଧନା ସ୍ୱାର୍ଥପରତା,
ଜନ ହିତ ପାଇଁ ଜୀବନ ଉତ୍ସର୍ଗ
ପ୍ରକୃତ ସନ୍ନ୍ୟାସୀ ଚିନ୍ତା ।"
ଗୁରୁଙ୍କ ଅକାଟ୍ୟ ଧିକ୍କାର ବଚନ
ଶୁଣି ଶିଷ୍ୟ ମହାଭାଗ,
ହୃଦୟେ ଗଭୀର ରେଖାପାତ କରି
ଚେତେଇଲା ନୂଆ ଦିଗ ।
ଆକୁମାରୀ ହିମାଚଳ ବୁଲି, ଜଡ-
ଅଜ୍ଞାନତା, ଦରିଦ୍ରତା,
କରିବାକୁ ଦୂର ବିଗଳିତ ପ୍ରାଣେ
ବ୍ରତୀ ହେଲେ ମହାନେତା ।
"ବହୁ ଜନ ସୁଖ, ବହୁ ଜନ ହିତ"
ପାଇଁ ସନ୍ନ୍ୟାସୀ ଜନମ,
"ଯହିଁ ଜୀବ ତହିଁ ଶିବ" କରମରେ
ନରେନ ହୋଇଲେ ଧନ୍ୟ ।
'ଅଦୈତ୍ୟ ବାଦର' ଭିତ୍ତିରେ ଗଢିଲେ
ସେବା ଧରମ ପ୍ରାସାଦ,
ବିଶ୍ବ ଦରବାରେ ପରିଚିତ କଲେ
ହିନ୍ଦୁ ଧରମର ଭେଦ ।
ଗୁରୁ ରାମକୃଷ୍ଣ ବଦଳାଇଦେଲେ
ଆବାହମାନର ଧାରା,
ଅନୁସରି ଶିଷ୍ୟ ବିବେକାନନ୍ଦ
ଶ୍ରେଷ୍ଠ ସନ୍ନ୍ୟାସୀ ଧରା ।