ଶ୍ରେଷ୍ଠ କବିତା

 ମୁଁ ଆଜି ଯାଏ ପଢିଥିବା କବିତା ମଧ୍ୟରୁ

ତୁମେ ମୋର ଶ୍ରେଷ୍ଠ କବିତା ।

 ତୁମକୁ ଦେଖିଲା ମାତ୍ରେ

ଫିଟି ଯାଏ ସବୁ ଗଣ୍ଠି, ମୁକୁଳି ଯାଏ ସମସ୍ତ ଗୁମର 

ସବୁ ଶବ୍ଦ, ସବୁ ଶୃଙ୍ଗାର ସାବଲୀଳ ଲାଗେ

ଜମାରୁ ଦୁର୍ବୋଧ୍ଯ ଲାଗ ନାହିଁ,

ସବୁ ଭାବ ସଞ୍ଚରି ଯାଏ ହୃଦରୁ ହୃଦକୁ ।

 କିଏ ସେହି ସ୍ରଷ୍ଟା, 

କାହାର ଗୋ ତୁମେ ଦିବ୍ୟ ସଂରଚନା ।

ତୁମକୁ ପଢିବା ଆରମ୍ଭିଲା ମାତ୍ରେ

ପଞ୍ଚଭୂତ, ପଞ୍ଚନ୍ଦ୍ରୀୟ ମୋର 

ଆବେଗର ବେଗକୁ ପାରନ୍ତିନି ରୋକି

ନଈ ହୋଇ ବହିଯାନ୍ତି ସମୁଦ୍ରେ ମିଶିବା ପାଇଁ ।

 ତୁମେ ମୋର ପାଖ ଦେଇ ଚାଲି ଗଲେ,

ଚିହିଁକି ଉଠେ ମୋ କାଵ୍ଯ ପୁରୁଷ

ଭୃଣେଇ ଯାଏ ଶବ୍ଦର କଳିକା ।

ତୁମ ପାଇଁ ମୋର ସବୁ ଉଚ୍ଚାରଣ

ଅନ୍ୟମାନଙ୍କୁ ଲାଗେ କବିତା କବିତା ।

 ବର୍ଷାଭିଜା ସବୁ ଝିଅ ମୋତେ ଲାଗନ୍ତି ପ୍ରେମିକା ।

ହେଲେ ଏ ବର୍ଷାରେ 

ତୁମେ ମୋର ଶ୍ରେଷ୍ଠ ଉପଲବ୍ଧି,

ମୋ ଶ୍ରେଷ୍ଠ କବିତା ।।