ଶ୍ରେଷ୍ଠ ଅଲମ୍ପିଆନ

ନିଜ ଓଜନଠାରୁ ଦୁଇଗୁଣ ଉଠାଉଥିବା

        ଭାରଉତ୍ତୋଳକ

        ପ୍ରଶିକ୍ଷଣ ନିଏ

         ଅଭ୍ୟାସ କରେ

ସୁଦୃଢ ପେଶୀ ଗଠନେ, ଦୀର୍ଘଜୀବନ

ଆଉ ପ୍ରତିଯୋଗିତା ନିମନ୍ତେ,

ଯାହା ଗୋଟିଏ ଦିନର ନୁହେଁ

ଅନେକ ଦିନର,

ଆଶା -ନିଜେ ବିଜୟୀ ହେବା

ଦେଶର ଜୟ ଜୈତ୍ର ଉଡାଇବା ।

କିନ୍ତୁ; ମହିୟସୀ ମହିଳାଟେ

ଗର୍ଭରେ ଦଶମାସ ଦଶଦିନ

ପିଲାଟିର ଭାର ବୋହିଚାଲିଥାଏ,

ପରିବାରର ବୋଝ

ନିଜ ଜୀବନର ବୋଝ ସହିତେ

ସମାଜର ବୋଝକୁ

ବିନା ପ୍ରଶିକ୍ଷଣ-ବିନା ଅଭ୍ୟାସରେ

କାନ୍ଧରେ କାନ୍ଧେଇ ଥାଏ ।

ସେ'ତ ଶ୍ରେଷ୍ଠ ଅଲମ୍ପିଆନ 

    ଭାରଉତ୍ତୋଳକ

ଧରିତ୍ରୀ ସମ ନିଜ ଓଜନଠାରୁ

ଶହ ଶହଗୁଣ ଓଜନ ବୋହିଚାଲିଛି

ନା'ପ୍ରତିବାଦ ଅଛି

ନା'ପ୍ରତିକ୍ରିୟା ଅଛି

କର୍ତ୍ତବ୍ୟର ବୋଝକୁ ବୋହି ଚାଲୁ ଚାଲୁ

ସେ କେବେ ଥକି ପଡେନା

    ବୋହିଚାଲିଥାଏ

ଅନ୍ୟର ବୋଝର ଭାରାକୁ

କେବେ ନଇଁ ପଡେନା

କି କେବେ ଭାଙ୍ଗି ପଡେନା

    ଖୁସିହୁଏ

ଆନ ମୁଖେ ଦେଖି

ଚେନାଏ ହସକୁ ।