ଶ୍ରଦ୍ଧାରେ ସାଉଁଟେ ଶରଧାବାଲି

ଶ୍ରଦ୍ଧାରେ ସାଉଁଟେ ଶରଧାବାଲି

ଆନନ୍ଦେ ତାହାକୁ ମୁଣ୍ଡରେ ବୋଳି

ଭାବରେ ଭାବୁଛି ମୁକ୍ତିର ଧୂଳି

ପୁଣ୍ୟର ପସରା ଯାଉଟି ଖୋଲି ll

ରଥ ଚକ ଏଠି ଯାଇଛି ଗଡି

ଚୌରାଶି ନର୍କକୁ ଦେଇଛି ତଡି

ପରଂବ୍ରହ୍ମ ଦାରୁ ରଥରେ ଚଢି

ପବିତ୍ର କରିଛି ଶ୍ରଦ୍ଧାର ମାଟି ll

କୋଟି କୋଟି ଭକ୍ତ ପାଦର ଧୂଳି

ଦାଣ୍ଡରେ ଲୋଟୁଛି କଣିକା ଭଳି

ସାଧୁ ସନ୍ଥଙ୍କର ତପସ୍ୟା ସ୍ଥଳୀ

ସ୍ମାରକୀ ବହନେ ଶରଧା ବାଲି ll

ପତିତ ପାବନ ପ୍ରଭୁ ଶ୍ରୀହରି

ଲୀଳା କରୁଛନ୍ତି ପୁରୀରେ ରହି

ମହିମା ତାଙ୍କର ପ୍ରସାର କରି

ଶ୍ରଦ୍ଧାରେ ଡାକନ୍ତି କଲ୍ୟାଣ ପାଇଁ ll

ଶରଧା ବାଲିକୁ ବୋଳି ଦେହରେ 

ଭକତ ଭଜଇ ପ୍ରଭୁ ଭକ୍ତିରେ

ଭାବ ବିନୋଦିଆ ଚକା ଆଖିରେ

ଆଶିଷ ଦିଅଇ ଖୁସି ମନରେ ll

ଶରଧା ବାଲିରେ ମୁଣ୍ଡିଆ ମାରି

ଦୁଃଖ ଜଣାଇଲେ ଶୁଣେ ଦୈତାରୀ

ସତ୍ୟ ଧର୍ମ ପଥ ଦିଏ ବତାଇ

ସଂସାର କଷଣ ଯାଏ ଦୁରେଇ ll