ଲାଇବ୍ରେରୀ
ପ୍ରୋଫାଇଲ୍
ସହଜ ଜୀବନ
ସହଜ ଜୀବନ
1 min
160
ଜୀବନ ଯେ ବଡ ସହଜିଆ ଥିଲା
ନ ଥିଲା ଛନ୍ଦ କପଟ
ଗାଆଁ ତୋଟା ମାଳ ପାହାଡ ଝରଣା
ସାଙ୍ଗ ସାଥି ଥାଟ ବାଟ।
ରଜ ଦୋଳି ମଜା ପିଠା ପରବରେ
ମନ ଥିଲା ଉଲ୍ଲସିତ
ଝିଅ ମାନଙ୍କର ପୁଚି ଖେଳ ଆଉ
ଖୁଦୁରକୁଣୀ ଓଷା ତ।
ଯୋଗୀ ର କେନ୍ଦରା ଗୀତ ମନ ଛୁଆଁ
କ୍ଷେତ ବାଡ଼ିର ସୌନ୍ଦର୍ଯ୍ୟ
ଶାଗ ମୁଗ ଡାଲି କାଠ ଚୁଲା ଖାଦ୍ୟ
ଗୁଡ଼ି ଉଡାର ମାଧୂର୍ଯ୍ୟ।
ଗ୍ରାମ ପରିବେଶ ଆହାକି ସୁବେଶ
ନ ଥିଲା ଯେ ଆଡମ୍ବର
ସବୁଠାରେ ଥିଲା ଆତ୍ମୀୟତା ଭାବ
ଭାବନାର ଗନ୍ତାଘର।
ଏଇ ପରିବେଶ ନାହିଁ ଆଗଭଳି
ଜୀବନ ହୁଏ ଜଟିଳ
ଆହେ ଦୟାମୟ କାଳିଆ ଠାକୁର
ଫେରି ଆସୁ ପିଲାବେଳ।
