ଶିଶୁ ଗୀତ

ଗେହ୍ଲା ନାତି ସୋନୁ ହାତଟିକୁ ଧରି

କୋଳରେ ବସାଇ ଆଈ

କହିଲେ କହିବି ଅଗଡ଼ ବଗଡ଼

ଶୁଣିବୁ ତୁ ମନ ଦେଇ ।

ବଡି ଭୋର ରୁ ଛାଡ଼ିବୁ ତୁ ଶେଯ

ଅଳସ କରିବୁ ନାହିଁ

ମୁଣ୍ଡିଆ ମାରିବୁ ସୁରୁଜ ଦେବତା

ପୁରୁବ ଦିଗକୁ ଚାହିଁ ।

କଅଁଳ କିରଣ ଭାରି ଉପକାରୀ

ସତେଜ ହୁଅଇ ମନ

ଦେହ ଟାଣ କରି ଶକତି ଯୋଗାଏ

ଆନନ୍ଦ ଲାଗଇ ଦିନ ।

କରିବୁନି ଅଳି ଖାଇବାକୁ କେବେ

ବଜାର ଜିନିଷ କିଣି

ମା'ଯାହାଦେବେ ଖାଇବୁ ଖୁସିରେ

ନୀରୋଗ ରହିବୁ ଜାଣି ।

ପାଠପଢି ଯିବୁ ଠିକ୍ ସମୟରେ

ଉଛୁର କରିବୁ ନାହିଁ

ଏକ ମନ ହୋଇ ପାଠପଢା କରି

ଖେଳିବୁ ତୁ ସାଥି ହୋଇ ।

ସାଥି ପିଲା ସହ ଝଗଡ଼ା ନକରି

ସେନେହ ପରାଣ ଦେଇ

ମିଳିମିଶି ଚଳି ମନନେଲେ ଜିଣି

ତୋ ଠାରୁ ଶିଖିବେ ଭାଇ ।

ନିର୍ମଳ ରଖିବୁ ପରିବେଶ ତୋର

ରହିବୁ ସଫାସୁତୁରା

ଫୋପାଡ଼ିବୁ ନାହିଁ ଏଣେ ତେଣେ ଯେତେ

ଜରି କାଗଜ ଟୁକୁରା ।

ମଇଳା ନହେଉ ଜଳ,ମାଟି, ବାୟୁ

ଧରଣୀ ମାଆ ଶରୀର

କେତେ ଆନନ୍ଦ ରେ ପାଳୁଛି ସଭିଙ୍କୁ

ନରଖି ବାଛ ବିଚାର ।

ତା'ଝରଣା ନଈ ପାହାଡ ପର୍ବତ

ନିତି କହେ ନୁଆ କଥା

କେଡ଼େ ବିରାଟ ସେ ଉଦାର ପଣରେ

ସରଜିଛି ବନଲତା ।

ଦେଶ ମା'ଠାରୁ ବଡ଼ ନାହିଁ କେହି

ତାକୁ ଜଗିଥାଏ ଯିଏ

ବୀର ସଇନିକ ସାଜି ସିଏ ପରା

ମରଣ କୁ ଜିତିଯାଏ ।

ଆଜି ଛୋଟ ଅଛୁ କାଲି ବଡ଼ ହେବୁ

ରଖିଥିବୁ ସୋନୁ ମନେ

ଅଗଡ ବଗଡ଼ ନୀତି କଥା ଏହା

ଆଚରିଯିବୁ ଜୀବନେ ।