ଶିଖି ଶିଖେଇବା

ପୂଜା ଠାରୁ ବଡ଼   ବିଶ୍ୱାସ ହୃଦୟେ,

    ବିଶ୍ୱାସ ହିଁ ଶ୍ରେଷ୍ଟ ପୂଜା ।

କହିବା ପୂର୍ବରୁ    ଶୁଣିବା ଶିଖିଲେ,

   ଅବୁଝା ରୁହେନା ଭେଜା ।।

ଲେଖିବା ପୂର୍ବରୁ   ବୁଝିବା ଜରୁରୀ,

   ଲାଭ କିସ ଲେଖି ଲେଖି ।

ଉପାର୍ଜନ ନାହିଁ,   ଖର୍ଚ୍ଚ ବଢ଼ାଇଲେ,

   ଋଣ ଭାର ହୁଏ ସାକ୍ଷୀ ।।

ହାରିବା ପୂର୍ବରୁ,  ଚେଷ୍ଟା ଜାରି ରଖ,

    ଭୟରୁ ହୁଅଇ ହାର ।

ସମ୍ପର୍କ ଗଢିଣ,   ଲାଭ କିବା ଥାଏ,

    ଲିଭାଇ ଯଦି ନ ପାର ।।

ମରିବା ପୂର୍ବରୁ,   ମନ ଖୋଲି ଜିଅ,

   ଦୁଃଖ ସୁଖ ସାଥେ ନେଇ ।

କାହାରି ଦୁଃଖରେ, ଖୁସି ନ ହୋଇଣ,

    ବଞ୍ଚିବାକୁ ଦିଅ ଭାଇ ।।

ହସ ଦେଇ ଥାଏ,  ଦଇବ ବିଧାତା,

    କାନ୍ଧ ବି ତାର ଭିଆଣ ।

ଗୋଟିଏ ମୁଦ୍ରାର,  ଦୁଇ ପାର୍ଶ୍ଵ ଭଳି,

   ହସ କାନ୍ଧର ଜୀବନ ।।

ଗୁରୁ ଗୁରୁଜନ,   ଦେବତା ସମାନ,

   ମନରୁ ନ ତେଜ କେହି ।

ଦିନ ଚାଲିଯିବ,    ବୟସ ଟଳିବ,

    ଚିହ୍ନ ଥିବ ସାଥେ ରହି ।।

ଲୋଭରୁ ଯେପାପ, ପାପରୁ ଯେମୃତୁ,

    ଏହି ଯେ ସତ୍ୟ ବଚନ ।

ପେଟ ଦାନା ପାଇଁ, କର୍ମ ପଥେ ରହି,

    ରଖିବା ନିଜ ସମ୍ମାନ ।।

କୃଷକ ଶ୍ରମିକ,   ଶିକ୍ଷକ ଠୁଁ ଯନ୍ତ୍ରୀ,

     ସଭିଏଁ କରନ୍ତି କର୍ମ ।

ନିଜ କର୍ମ ପଥ,    ନିଜ ପାଇଁ ବଡ଼,

   ଭେଦ ଭାବ ହିଁ ଅଧର୍ମ ।।