ଶୀତ
ଶୀତ
ଜାଣିଛ କି ପିଲେ ଗୋଟିଏ ବରଷେ
ଛଅ ଋତୁ ହୋଇଥାଏ
ଗ୍ରୀଷ୍ମ ବର୍ଷା ଋତୁ ଶରତ ହେମନ୍ତ
ଶୀତ ଓ ବସନ୍ତ ହୁଏ l 1 I
ପୌଷମାଘ ଦୁଇ ଶୀତ ମାସ କହି
ଏ କଥାକୁ ମନେ ରଖ
ଶୀତ ଦିନେ ପିଲେ ସକାଳୁ ସକାଳୁ
ବ୍ୟାୟାମକୁ ଜାରିରଖ l 2 I
ଶୀତର ଦାୟରୁ ରକ୍ଷା ପାଇଁ ଲୋକେ
କମ୍ବଳ ଚାଦର ନେଇ
ଘୋଡ଼ି ହୋଇ କିଏ ଶୋଇଥାନ୍ତି ଘରେ
ନିଆଁ ପାଖେ ବସେ କେହି l 3 I
କୁହୁଡ଼ି ଘେରରେ ଚାରିଦିଗ ସତେ
ଲାଗଇ କି ଅନ୍ଧକାର
ଘାସରେ ପଡଇ କାକରର ବିନ୍ଦୁ
ଦିଶଇ କି ମନୋହର l 4 I
ହୁକୁହୋ ହୁକୁହୋ ରାତିରେ ବିଲୁଆ
ଶବଦ ବଣରୁ ଶୁଭେ
ରଙ୍ଗବିରଙ୍ଗର ଚଢେଇ କୂଜନ
ଶୁଣିବାକୁ ଭଲ ଲାଗେ l 5 I
ଚାଷୀର ଖାତିରି ନଥାଏ ଶୀତକୁ
ସକାଳୁ ଉଠି ସତ୍ୱର
କାମ କରିବାକୁ ଚାଷଜମି ପାଖେ
ହୁଅଇ ଶୀଘ୍ର ହାଜର l 6 I
ତୁଳସୀ ଚଉରା ନିକଟରେ ମାଆ
ସକାଳୁ କରନ୍ତି ପୂଜା
ମନ୍ଦିର ଭିତରୁ ଘଣ୍ଟର ଶବଦ
ମନ୍ଦିରେ ଉଡ଼ଇ ଧ୍ୱଜା l 7 I
ରଙ୍ଗ ବେରଙ୍ଗର ଶୀତଲୁଗା ପିନ୍ଧି
କେତେ ଲୋକ ବାହାରନ୍ତି
ରେଜେଇ କମ୍ବଳ ଅଭାବୁ ଗରିବ
ଲୋକେ ଶୀତେ କଷ୍ଟ ପାନ୍ତି l 8 I
ଶୀତରେ ଦିବସ ହୁଅଇଟି ସାନ
ହୁଅଇ ବଡ଼ ରଜନୀ
ହଳଦୀ ରଙ୍ଗର ପାଚିଲା ଧାନକୁ
ଦେଖି ଖୁସି ଲାଗେ ପୁଣି l 9 I
ଟମାଟୋ ଗାଜର ମୂଳା ବନ୍ଧାକୋବି
କାକୁଡ଼ି ଓ ବାଇଗଣ
ଶୀତଦିନେ ସବୁ ବାଡ଼ି ବଗିଚାରେ
ଏହା ମିଳିଥାଏ ଜାଣ l 10 I
ଫୁଲ ବଗିଚାରେ ଦେଖିବାକୁ ମିଳେ
ଗେଣ୍ଡୁ ସୂର୍ଯ୍ୟମୁଖୀ ଫୁଲ
ସୁଗନ୍ଧରେ ସତେ ଧରା ଉପବନ
ଚହଟଇ ସର୍ବସ୍ଥଳ l 11 I
ସରସ୍ୱତୀ ପୂଜା ମକର ସଂକ୍ରାନ୍ତି
ଶାମ୍ବ ଦଶମୀର ପର୍ବ
ଅଗ୍ନିର ଉତ୍ସବ ଧନୁ ସଂକ୍ରାନ୍ତିର
ପାଳନ ଆମରି ଗର୍ବ l 12 I
ଶୀତ ଦିନେ ଆହା ବଣଭୋଜି ସହ
ପରିଭ୍ରମଣ ର ମଜା
ସରିଯିବା ପରେ ବିଦାୟ ଶୀତକୁ
ପ୍ରବେଶ ଋତୁଙ୍କ ରାଜା l 13 I
ହେମନ୍ତ ଋତୁ ର ସହଚରୀ ଶୀତ
କହନ୍ତି ଶୀତ ମାଉସୀ
ଉତ୍ତରା ହେମାଳ ପବନ କୁ ଧରି
ପାଦ ଥାପେ ନେଇ ଖୁସୀ I 14 I
ଶୁଣ ପିଲାମାନେ ଶୀତଋତୁ ବେଳେ
ହେବା ନାହିଁ ଅଳସୁଆ
ନିଜ କାମ ଯଦି କରିଚାଲୁଥିବା
ସଫଳ ନିଶ୍ଚୟ ଥୁଆ l 15 I