ବଡ଼ା ଅସୁବିଧା ହୋଇଗଲା
ବଡ଼ା ଅସୁବିଧା ହୋଇଗଲା
(ଶିଶୁ ହାସ୍ୟ କବିତା)
ପରୀକ୍ଷା ହୋଇବ ଅର୍ଦ୍ଧ ବାର୍ଷିକ ଯେ
ଶିକ୍ଷକ କହିଣ ଗଲେ
ଭଲ ପାଠପଢ଼ି ଆସିଥିବ ପିଲେ
ଡରିବନି କେବେ ହେଲେ I 0 I
ଯାହା ପଢିଅଛ ଘରକୁ ଯାଇଣ
ଖୋଲ ବହିଖାତା ଯାଇ
ଅଭ୍ୟାସ କରିଲେ ପ୍ରଶ୍ନ ଓ ଉତ୍ତର
ଫଳାଫଳ ଭଲ ହୋଇ I 1 I
ସାହିତ୍ୟ ଶିକ୍ଷକ କହନ୍ତି ପିଲାଏ
ଭଲ କି ବହି ପଢ଼ିବ
ଗଦ୍ୟପଦ୍ୟ ପ୍ରଶ୍ନ ସହ ଅନୁଚ୍ଛେଦ
ପ୍ରବନ୍ଧ କୁ ଧ୍ୟାନ ଦେବ I 2 I
ଦରଖାସ୍ତ ସହ ପତ୍ର ଲିଖନ ଟି
ଖାତାରେ ଅଭ୍ୟାସ କର
ବ୍ୟାକରଣ ପ୍ରତି ଦୃଷ୍ଟି ଦେଲେ ତୁମେ
ହୋଇବ ସବୁ ସୁନ୍ଦର I 3 I
ତେଣୁ ନିତି ତୁମେ ଅଭ୍ୟାସ କରିବ
ନ ହୋଇବ ଅଳସୁଆ
ଯଦି ପରୀକ୍ଷା ରେ ଉତ୍ତୀର୍ଣ୍ଣ ନ ହୁଅ
ମାଡ଼ ତୁମ ପାଇଁ ଥୁଆ I 4 I
ମାଡ଼କଥା ଶୁଣି ସବୁ ଛାତ୍ରଛାତ୍ରୀ
ଘାରିଲା ଯେ ଭାରି ଭୟ
ସାହିତ୍ୟ ଶିକ୍ଷକ ଯାହା କହିଥାନ୍ତି
କରିଥାନ୍ତି ଯେ ନିଶ୍ଚୟ I 5 I
ଗୋବିନ୍ଦା ଓ ଭୀମା ଭାରି ଦୁଷ୍ଟ ଦୁଇ
ପାଠରେ ନ ଥାଏ ମନ
ଶ୍ରେଣୀ କୋଠରୀ ରେ ଚଗଲାମୀ କରି
କଟୁଥିଲା ଏତେ ଦିନ I 6 I
ଶିକ୍ଷକ ଙ୍କ କଥା ପରୀକ୍ଷା ରେ ଯଦି
ଅକୃତକାର୍ଯ୍ୟ ଯେ ହେବ
ମାଡ଼ ଉପାଖ୍ୟାନ ଗୋବିନ୍ଦା ଓ ଭୀମା
ଭାବନ୍ତି କଣ ହୋଇବ I 7 I
ଗୋବିନ୍ଦା କୁ ଭୀମା କୁହେ ଶୁଣ ସାଙ୍ଗ
ଏବେ ଯେ କରିବା କିସ
ଯଦି ନ ହୋଇବା ଓଡ଼ିଆ ରେ ପାସ
ଶିକ୍ଷକ ହୋଇବେ ରୋଷ I 8 I
ସାହିତ୍ୟ ଶିକ୍ଷକ ରାଗିଲେ ଆମକୁ
ଦେହେ ହେବ ବୃଷ୍ଟି ମାଡ଼
କପି ହିଁ ଭରସା ଆମ ଜୀବନ ରେ
ଅନ୍ୟଥା ସବୁଠି ବାଡ଼ I 9 I
ଭୀମା କହେ ଯଦି ଧରା ପଡ଼ିଗଲେ
ସେଠି ହେବା ଲୋକହସା
ପାଠ ଯଦି ଆମେ ଭଲ ପଢ଼ିଥାନ୍ତୁ
ନିଜକୁ ଥାନ୍ତା ଭରସା I 10 I
ଗୋବିନ୍ଦା କୁହଇ ପ୍ରଥମ ଦିନରେ
ସାହିତ୍ୟ ଭୂଗୋଳ ଅଛି
ପ୍ରଥମେ ସାହିତ୍ୟ ଦ୍ଵିତୀୟେ ଭୂଗୋଳ
ଭୁଲିବୁନି ଜମା କିଛି I 11 I
ତା'ର ପରଦିନ ବିଦ୍ୟାଳୟ ଠାରେ
ପରୀକ୍ଷା ଆରମ୍ଭ ହେଲା
ସାହିତ୍ୟ ରୂପରେ ପ୍ରଥମ ବିଷୟ
ଶିକ୍ଷIର୍ଥୀ ମାନଙ୍କ ଥିଲା I 12 I
ଗୋବିନ୍ଦା ଓ ଭୀମା ପରସ୍ପର ଦୁହେଁ
ହେଉଛନ୍ତି ଚାହାଁଚାହିଁ
ଶିକ୍ଷକ ବୁଲନ୍ତି ପରୀକ୍ଷା କେନ୍ଦ୍ରରେ
ଲେଖିବା ରେ କଷ୍ଟ ହୋଇ I 13 I
ଆଗପଛ ଆଉ ଉପର ତଳକୁ
ଗୋବିନ୍ଦାର ହାବଭାବ
ଦେଖିଣ ଶିକ୍ଷକ ଭାବିଲେ ନିଶ୍ଚିତ
କିଛି ଗଡବଡ ଥିବ I 14 I
ଶିକ୍ଷକ କୁ ପାଖେ ଗୋବିନ୍ଦା ଦେଖିଣ
ଦେହେ ଝାଳେ ହେଲା ଓଦା
ସାର୍ଟର ପକେଟ ଖାତାର ଭିତରେ
ହୋଇଅଛି କପିଗଦା I 15 I
ଶିକ୍ଷକ ହାତରେ ଧରାଯେ ପଡ଼ିଣ
ଗୋବିନ୍ଦାକୁ ପଡ଼େ ମାଡ଼
ମାଡ଼ ର ଶବଦ ଶୁଣିଣ ଯେ ଭୀମା
ନ ଉଠାଏ ନିଜ ମୁଡ I16I
ଶିକ୍ଷକ କହିଲେ ହଇରେ ଗୋବିନ୍ଦା
ଏ କଣ କରୁଛୁ ତୁହି
ସାହିତ୍ୟ ବଦଳେ ଭୂଗୋଳର କପି
ଧରି ଆସିଛୁ ପଳେଇ I 17 I
ସାହିତ୍ୟ ଜାଗାରେ ଭୂଗୋଳ ଲେଖିଲେ
ନିଶ୍ଚେ ପାଇବୁଟି ଶୂନ
ଭଲ ପାଠ ଯଦି ପଢ଼ିଥାନ୍ତୁ ବାବୁ
ହୁଅନ୍ତୁ କି ହୀନିମାନ I 18 I
ସାହିତ୍ୟ ଜାଗାରେ ଭୂଗୋଳ ର କପି
ଗୋବିନ୍ଦା ଆଣିଛି ଭିଡ଼ି
ଏହିକଥା ଶୁଣି ସବୁ ଛାତ୍ରଛାତ୍ରୀ
ହସି ଯାଉଛନ୍ତି ଗଡ଼ି I 19 I
ଶିକ୍ଷକ କହିଲେରେ ପୁଅ ଗୋବିନ୍ଦା
ଏବେ ବି ସମୟ ଅଛି
ଭଲ ପାଠପଢ଼ ନିଜକୁ ସୁଧାର
ଠିକ ହେବ ସବୁ କିଛି I 20 I
ଅଭ୍ୟାସ ବଳରେ ପାଠକୁ ନିଶ୍ଚିତ
କରିଣ ହେବ ଆୟତ୍ତ
ବିଦ୍ୟା ଠାରୁ ବଳି ଏହି ଦୁନିଆରେ
ନାହିଁ କିଛି ବଡ଼ ବିତ୍ତ I 21 I
ଯଦି ପାଠ ପଢ଼ା ଅବୁଝା ଲାଗୁଛି
ଶିକ୍ଷକ ସାହାଯ୍ୟ ନିଅ
ଅଭ୍ୟାସ ବଳରେ ସବୁଯେ ସମ୍ଭବ
ଏ କଥା ଭୁଲି ନା ଯାଅ I 22 I
ଭଲ ପାଠପଢ଼ି ହୁଅ ଭଲପିଲା
ପାଠରେ ଯେ ଦିଅ ଧ୍ୟାନ
ପାଠ ଠାରୁ ମିଠା ଜଗତରେ ନାହିଁ
ଏ ବଚନ ହୃଦେ ଘେନ I 23 I
ଶିକ୍ଷକଙ୍କ କଥା ଶୁଣିଣ ଗୋବିନ୍ଦା
ଆଖିକରି ଛଳଛଳ
କରୁଛି ଶପଥ ପଢ଼ିବି ମୁଁ ପାଠ
ଟାଣ କରି ମନୋବଳ I 24 I
ଶୁଣିଣ ଶିକ୍ଷକ ଗୋବିନ୍ଦା ମୁହଁରୁ
ନିସୃତ ଏପରି କଥା
ଆଉଁସିଣ ଦେଇ ଆଶୀର୍ବାଦ ଦେଲେ
ଖୁସି ରେ ଟେକିଲା ମଥା I 25 I