ଶୀତ ଆସିଛି.....

ସହରର ତଳ ବସ୍ତିକୁ ଶୀତ ଆସିଛି

ମାଟି କାନ୍ଥର ଫାଟ ଦେଇ

ଚିରା କନ୍ଥାର ବାଟ ଦେଇ

ଦାରିଦ୍ର୍ୟତାର ଓଠ ଦେଇ

ଆଉ ଲିଭି ଲିଭି ଜଳୁଥିବା କାଠ ଦେଇ ।

ଉପର ବସ୍ତିରେ ତ

ମୋଟା ମୋଟା ଦାମିକା କମ୍ବଳ

ତୁଳାଦିଆ ଡନଲଫ୍ ଗଦି !

ନିଦ ଭାଙ୍ଗି ଆଖି ଖୋଲେ ଯେବେ

ବାଲକୋନୀରେ ଖେଳୁଥାଏ ରବି ।

ସହରର ତଳ ବସ୍ତିକୁ ଶୀତ ଆସିଛି

କଙ୍କାଳପ୍ରାୟ ଦେହ ଦେଇ

ଅଭାବୀ ମଣିଷ କୋହ ଦେଇ

ଲଙ୍ଗଳା ପିଲାର କାନ ଦେଇ

ଆଉ ମାଆର ଶୁଖିଲା ସ୍ତନ ଦେଇ ।

ଉପର ବସ୍ତିରେ ତ

ଢେର୍ ସାରା ଶୀତୁଆ ପୋଷାକ

ସ୍ଵେଟର ମଫଲର୍ ଜୋତା ଆଉ ମୋଜା,

ବିଦେଶୀ କୁକୁର ସାଥେ ଧରି

ଦେଶୀ ନିଏ ସକାଳର ମଜା ।

ସହରର ତଳ ବସ୍ତିକୁ ଶୀତ ଆସିଛି

ବାସି ପଖାଳର ଭୋକ ଦେଇ

ମହୁଲି ମଦର ଢୋକ ଦେଇ

କୃଷକ ଦାଆର ବେଣ୍ଟ ଦେଇ

ଆଉ ଶ୍ରମିକ ହାଡୁଆ ହାତ ଦେଇ ।

ଉପର ବସ୍ତିରେ ତ

ପିକନିକରେ ମସଗୁଲ୍ ପ୍ରାଣ

ଦମ୍ ବିରିୟାନି ଆଉ ଚିକେନ୍ ର କଷା,

ସାମ୍ପେନ୍ ସହ ହାଲକା ନୃତ୍ୟ ଦେଖି

ଶୀତ ନିଜେ ହୁଏ ଲୋକହସା ।