ଶାଶୁଘର
ଶାଶୁଘର
ସୁନାର ସଂସାର ଗଢିବା ପାଇଁକି
ଶାଶୁଘର ଗଲା ଝିଅ ।
ଦୁହିତା ସେ ଦୁଇ କୁଳ ହିତା ହେବ
ମନରେ ଭରିଛି କୋହ ।୧।
କେତେ କେତେ ଆଶା ଭରସା ମନେ ତା
ସବୁ କରି ଏକାକାର ।
ଶାଶୁଘରେ ପାଦ ଥାପିଛି ଝିଅଟି
ବୋହୁ ସେ ଶାଶୁଘରର ।୨।
ସେନେହ ଡୋରରେ ସଭିଙ୍କୁ ବାନ୍ଧିବ
ପାଇବ ସ୍ନେହ ଶରଧା ।
ଏଇ ଅଭିଳାଷ ମନରେ ସାହସ
ପ୍ରଭୁ ହୋଇବେ ବରଦା ।୩।
ଶାଶୁଘର ତାର ବଡଲୋକ ଘର
ତା ପାଇଁ ସେ ଘର ନୂଆ ।
ବୋହୁଟି ଆସିଲା ଘରକୁ ଯିବ ସେ
ବର ସଙ୍ଗେ ହେଲା ଠିଆ ।୪।
ଦୁଆର ମୁହଁକୁ ଶାଶୁ ତାର ଆସି
ବନ୍ଦାପନା କରି ନେଲେ ।
ଶାଶୁଘର ଯାଇ ଠାକୁରଙ୍କ ପାଶେ
ବିନତି ସେ କରାଇଲେ ।୫।
ମୁଣ୍ଡିଆ ମାରିଲା ବୋହୁଟି ସଭିଙ୍କୁ
ଗୁରୁ ଗୁରୁଜନ ଯେତେ ।
ସାନଙ୍କୁ ଆଦର ସତ୍କାର କରିଲା
କହିବା ସେ କଥା କେତେ ?୬।
ଗୁରୁ ଗୁରୁଜନ ସଭିଙ୍କୁ ସମ୍ମାନ
ଅତିଥି ସତ୍କାର କଲା ।
ସଭିଙ୍କୁ ସତ୍କାର କରି ସେ ବୋହୁଟି
ଶାଶୁଘର ଆଦରିଲା ।୭।
ବଡଘର ତାର ଶାଶୁଘର ହେଲେ
ସଭିଏଁ ନିଜର ତାର ।
ସଭିଙ୍କ ମହତ ରଖିଲା ବୋହୁଟି
ହେଲା ଅତି ଆପଣାର ।୮।
ଶାଶୁ ଶଶୁରଙ୍କ କଥାକୁ କେବେବି
ତଳେ ପକାଇ ନ ଦିଏ ।
ନଣନ୍ଦ ଦିଅର ସଭିଙ୍କର ସେ ତ
ଅତି ପ୍ରିୟ ହୋଇଥାଏ ।୯।
ସ୍ବାମୀ ତା ନିଜର ହୃଦୟର ହାର
ମଥାର ମୁକୁଟ ମଣି ।
ଖଟିଥାଏ ତାଙ୍କୁ ବୋହୁଟି ସର୍ବଦା
ସ୍ବାମୀଙ୍କର ମନ ଜାଣି ।୧୦।
ଶାଶୁଘର ହେଲା ସୁନାର ସଂସାର
ସରଗଠୁ ବଡ ହେଲା ।
ବାପଘର ଝିଅ ଶାଶୁଘର ଆସି
ସଭିଙ୍କ ମନ ତୋଷିଲା ।୧୧।
ଈଶ୍ବର କରନ୍ତୁ ସବୁ ଶାଶୁଘର
ସୁନାର ସଂସାର ହେଉ ।
ସବୁ ଝିଅ ଭଲ ଶାଶୁଘର ପାଇ
ସୁନାବୋହୁ ହୋଇଥାଉ ।୧୨