Library
Profile
ସ୍ଵଧାରା ନିବେଶ
ସ୍ଵଧାରା ନିବେଶ
କାଚକେନ୍ଦୁ ପୋଖରୀ ଜଳ
କଇଁ ଫୁଲରେ ହସୁଛି ଢଳଢଳ
କୁଆଁରୀ ଜହ୍ନ କରେ ଦୋଳି ଖେଳ
ସନ୍ତରଣ କେଳି କରନ୍ତି ମୀନ ଦଳ
ମାତ୍ର ତଳେ
କଳା ପଚପଚ ପଙ୍କ ତରଳ
ଉପରେ ଲାଗେ ଭାରି ଶୀତଳ
ଧୀର ନମ୍ର ଶାନ୍ତ ପ୍ରଶାନ୍ତ
ପବନ ସହିତ ମିଶି ଆଣେ ହିଲ୍ଲୋଳ
କଲ୍ଲୋଳିତ କରେ ମନ ଅଶାନ୍ତ
ମାତ୍ର ଆକାତ କାତ ପାଣିରେ
ପହଁରୁ ପହଁରୁ ବୁଡ଼ି ଯାଏ
ବଂଶର କୂଳ ପ୍ରଦୀପ
ଉଦିତ ସୂର୍ଯ୍ୟ ପହଁଚେ ଅସ୍ତାଚଳ
ସର୍ପିଳ ଗ୍ରାମପଥ
ଲମ୍ବିଛି ଯୋଜନ ଯୋଜନ ଦୂର
ବୁଲାଣି ପରେ ପରେ ଆସିବ ଚୌବାଙ୍କ
ଚାରି ଦିଗିଆ ରାସ୍ତା ଚାରିଧାର
ମନେ ନ ରଖିଲେ
ଭିନ୍ନ ଦିଗରେ ପଦପାତ ମାତ୍ରେ
ଗନ୍ତବ୍ୟ ସ୍ଥଳରେ ପହଞ୍ଚି ପାରେନା
ପଥିକ ପଦଚା
ରୀ ହରବର ।
ପବିତ୍ର ପ୍ରେମପଥ
ଯୁଗ୍ମ ହୃଦୟରେ ସ୍ଥାନ ମିଳିଗଲେ
ମନ ମିଶିଗଲେ
ଘର ବଂଶ କୂଳ ଜାତି ଛାଡ଼ି
ଚାଲିଯାଏ ଅନ୍ୟର ହାତ ଧରି
ବାଇ ଚଢ଼େଇର ମନ ନେଇ
ବାନ୍ଧିବାକୁ ଭିନ୍ନ ନୀଡ଼
ମାତ୍ର ଛୋଟ ମୋଟ
ଘଟଣାର ଧୂଆଁ ଧାସରେ
ହୁଏ ଜଟିଳ ପଙ୍କିଳ
ଲାଗେ କଳଙ୍କର କଳା ଟିକା
ନିଏ ଭିନ୍ନ ମୋଡ
ଭଲ ବି ଅଛି ଭେଲ ବି ଅଛି
ସରଳ ବି ରହିବେ ଗରଳ ବି ଗର୍ଜିବେ
ଭାବନ୍ତୁ
ଭାବି ଦେଖନ୍ତୁ
ଆମ ପାଇଁ
ଦୁଇଟି ପଥ
ଦୁଇଟି ଧାରା
ଦୁଇ ନିର୍ଦ୍ଦେଶ
ସୁନ୍ଦର ସୁଗମ ମାର୍ଗ
କଠିନ କରାଳ ବର୍ଗ
ବିବେକ ଲଗେଇ ଦିଅ
ବାଛି ନିଅ ସୁନିଶ୍ଚିତ ପନ୍ଥା
ସ୍ୱଧାରା ନିବେଶ ।
